顯示具有 04. 小夢文章 標籤的文章。 顯示所有文章
顯示具有 04. 小夢文章 標籤的文章。 顯示所有文章

2016年9月8日 星期四

0 一個人知道自己為什麼而活,就可以忍受任何一種生活

我偶像的偶像尼采(註1)寫過:「一個人知道自己為什麼而活,就可以忍受任何一種生活。(註2)」



有幾多人,可以知道自己為什麼而活?不要說為夢想而活,人大了,就連簡單想做一件想做的事亦都有困難。世俗太多的枷鎖,漸漸地令自己成為別人希望你成為的人。

2016年5月9日 星期一

0 小夢@消失的兩年! 久違了, 各位網友~~

開番個BLOG 一望, WA~~原來接近兩年無更新!
對上仲係寫緊北海道既蜜月之旅, 仲要只係寫到DAY2....

見到好多朋友,同事都結咗婚搬哂屋有D連仔都生埋,或者都大緊肚超級恩愛咁

消失既日子我去咗邊?

唔講大家唔知, 我平時係點寫網誌呢? 我就喺一間只有大約40呎既房中,坐喺床上面一邊打機/睇電視/玩電話再一邊開住部電腦!做廣告呀,打機Loading 呀,咪番去電腦度打一百幾十字囉。。。咁Upload 相/構思時要時間,又可以番去打機/睇電視。。。

講咁耐,即係去咗邊?



2013年10月29日 星期二

0 My 31



不經不覺又一年...可能人大左, 對生日其實都無乜太特別的感覺, 今天我如常番工, 如常做平日每日做的事, 簡簡單單咁過一日....已經好滿足....

上 年寫過My 30 , 岩岩自己睇番, 又再慢慢回想自己呢一年做既事, 其實都好多事喺今年發生, 最最最重大當然係結婚, 另外有同老友們做過幾次唔同既生意, 加上股市方面既努力, 整体上整個30 歲過得好充實, 亦都好順利滿意....甚至AsiaMiles 亦由目標既6 萬里儲到有近30 萬....睇黎要盡快抽時間plan 行程去下旅行了....而傷心的, 是陪了我二十年的點點, 離開了.....

寫blog 方面真係由於太忙, 無乜時間打理, 好多時候都有好靈感想打出來, 但時間實在有限, 最終都只能放棄, 不過依然每日有好多人黎睇, facebook pages 亦多左幾十人, 雖然, 我唔係好在意有幾多人睇, 有幾多人讚好, 但其實心底都係開心既......可惜, yahoo blog 亦都會執, 而呢篇亦都係真正最後一篇發文 (因為明天就會變為唯讀mode 了) 想繼續睇文, 交流既各位朋友, 記住要轉去我新blog http://siudreamlife.blogspot.hk/ 或者facebook facebook.com/siudream

今年既生日願望嘛, 其實都無乜貪心了, 可以好似今年咁一切順利, 身體健康, 其實都心滿意足....當然亦希望會有多d 時間同朋友敍一敍, 身邊既朋友家人全部都開開心心, 就可以了....

祝自己工作/生意/股票樣樣掂, 身體健康!!!

Happy Birthday to myself~~

最後, 感謝所有同我講過句生日快樂的, 謝謝!!

2012年10月17日 星期三

0 [小夢故事] 男人婚後故事 - 灰加藍

[男人婚後故事]灰加藍

(純愛無糖版,喜歡的,歡迎轉載。)


 

前言: 灰加藍呢篇故事其實最初係有點三級的情節,但好多睇完既男人想比佢身邊既女友/老婆睇,但又無奈地因為有露骨既情節而無咁做。我收到好多私信希望我會有潔淨無糖版,所以我少少地作更改。

人人都叫我廢哥,我唔介意人地咁叫我,因為我真心覺得自己廢。雖然,喺好多人眼中,我已經係好好。三張幾野,十幾年前大學畢業,做左兩年好運地升職人工唔 錯;同年屋企人幫助之下,幾十萬買咗有一層喺窮人區既樓,月供只係三千幾;三年後結婚,婚後兩年添丁,再兩年後又生多個女,有個看似美滿既幸褔家庭。

9 [男人婚後故事] 灰加藍

[男人婚後故事]灰加藍

(純愛無糖版,喜歡的,歡迎轉載。)


前言: 灰加藍呢篇故事其實最初係有點三級的情節,但好多睇完既男人想比佢身邊既女友/老婆睇,但又無奈地因為有露骨既情節而無咁做。我收到好多私信希望我會有潔淨無糖版,所以我少少地作更改。


人人都叫我廢哥,我唔介意人地咁叫我,因為我真心覺得自己廢。雖然,喺好多人眼中,我已經係好好。三張幾野,十幾年前大學畢業,做左兩年好運地升職人工唔
錯;同年屋企人幫助之下,幾十萬買咗有一層喺窮人區既樓,月供只係三千幾;三年後結婚,婚後兩年添丁,再兩年後又生多個女,有個看似美滿既幸褔家庭。


當身邊個個都話我已經係好好既時候,我依然覺得自己廢,覺得自己窮。你話我串咀又好,話我唔知足又好,我一直認為應該Stay
Hungry。結婚咁多年黎我無去過旅行,就算係生日都只係搵間平平地既日本餐廳食個Set
Dinner。著衫十年如一日,頭髮留長完又剪短等佢留長再剪,為咗慳水(同埋洗頭水)三日先洗一次頭,總之慳得就慳。

有一日,我被老闆召入房,多謝我呢十幾年為公司既貢獻,當日,我就失業了。其實我一早已經預左有呢一日,我覺得依家先比人炒已經係賺咗,我望住老闆比我呢張支票,粒聲無出就離開呢間由畢業就開始做既公司,帶住疲乏既身驅番屋企。



老婆知我被炒,第一句就鬧,第二句就喊,仲話想攬住D仔女一齊死。我無理到佢,一個人番入房蓋被過頭就訓。人生有咩悲慘得過一個原本你好愛既女人,當結婚
之
後就變左仇人,日日番屋企就淨係吵鬧。唔好話扑野,基本上我同我老婆已經好少講野。特別係生左對仔女之後,晚晚都係仔女同老婆訓喺間房,我就自己一個人睇
下咸片之後喺廳訓,佢地起身之前,我就番工。

失業後多咗時間喺屋企,但我同我老婆關係都無改善。諗住得閒買咗隻Mario
Party同個仔一齊玩下,就話我淨係識打機教壞個仔。上下網又話我一日到黑淨係識對住部電腦唔出去搵工,又比佢話係隱閉中年,大姐依家咩年代?我咁既年
紀搵工梗係上網搵,或者搵D 朋友幫下手有無介紹。

失咗業大約2星期,我日日都係忍受住老婆伊伊哦哦兼每日好似工人咁比佢指指點點。有一日下午我老豆即係我仔女阿爺黎接咗佢地落樓下公園玩,終於有機會同老婆兩個人獨處,我就把握機會對老婆提出性要求。

老婆話是但,叫我去沖個涼先,我梗係拿拿淋走入去沖,除衫開水落皂液沖水抹身,一分鐘就沖完衫都唔著走番出黎。

出到黎老婆仲喺度睇電視,我就叫佢拿拿聲一齊入房啦!佢仲叫我著番件衫先,我心諗著乜鬼轉頭都除,就唔理咁多走埋佢抱佢入房。

點知岩岩除咗佢件衫車輪都未開始打,電話就響,我老豆即係佢老爺打黎話個仔跌親喊住話要叫媽咪,個女見到個仔喊又喊,佢一個人搞唔掂叫我地落去幫幫手咁話。

我老婆就即刻推開我叫我著番衫一齊去接仔女,我話不如搞埋先,佢話今晚番黎再幫我搞掂。

夜晚D仔女又係痴住老婆訓,我見佢地都應該訓著咗,咪細細聲開房門走入去諗住鍚啖老婆,順便叫佢幫我搞掂番今朝答應要搞掂既事。



點知我痴個咀去老婆塊面度鍚佢一啖後,佢好大反應問我搞乜鬼話我嘈醒哂D仔女,我咪話細聲D唔會嘈到佢地啦,一係我地去廁所或者出廳,佢竟然鬧我痴線仲叫
我
快D出番去咪阻住佢訓覺。我由上年聖誕等到依家,當然唔會咁就走番出去,想一啖鍚埋老婆度諗住整慶佢先就會搞。點知佢真係慶,仲慶到一巴星埋我度叫我快D
欄番出去!

我真係好想即場就同佢開片,但我無。我死死地氣出番廳開著部電腦,求奇搵個良心網站上去解決一下,當我望住D AV 女優幻想同佢地激戰,到差不多戲玉時,我老婆走左出黎。

「你條變態佬喺度做乜野呀?」佢好大聲指住我問。

正常男人去到呢刻,都當然無會答佢呢個明知故問既問題,何況我唔係變態佬,更加唔會答佢。點知我老婆竟然搵野掉我,一路掉一路話我痴線佬變態佬。喺比佢掉中咗既一刻,我條子孫根無斷,不過我既幻想打斷咗,軟咗。

「你唔比我搞咪打飛機囉,唔係唔得嘛?」我真係好激氣!唔信,你試下打打下飛機比人搵野掉你掉到軟咗,你就會明白。

「你變態佬黎架?有老婆仲喺度睇咸片喺度打飛機?點解我會嫁著咁既老公?點解我會嫁錯人?」佢一路激動咁講一路喊。

我好想反擊佢,問佢究竟有無諗過要盡妻子既責任,連比幾分鐘我都唔肯。但我無,我真係無氣。我一個人喱入廁所,呢一刻,我都好想喊。

自此之後,我老婆每晚都鎖門訓,我亦都再無入過我自己間房。

失業之後兩個月,我為免成日喺屋企對住老婆鬧交,我都係出街Hea下,有Friend 得閒就約佢地食餐飯咁。

有一日,我同大學同學阿強食飯,原來佢畢業之後竟然去咗珠寶行做Sales,受惠自由行佢公司分店開到一間又一間,早幾年仲升埋做經理。知道我失業,就話介紹我入公司做,仲話依家D後生捱唔到長工時,而且更加無大學生入行,跟佢搵食兩三年應該好快升到做副經理就唔洗愁。

我從來無諗過一個三大畢業既人,三十幾歲竟然要走去做Sales,半推半就之下就上左佢公司寫字樓見工,亦都好快就請咗我,完結我兩個月失業既生涯。

簽約既時候我見到自己工時都嚇咗一跳,朝十晚十,12個鐘番,每星期番6日,勞工假,月薪一萬,飯錢每日60。計一計,時薪都只係得三十蚊。

第一日番工,朝早九點半喺鋪頭門口等,等齊人就開閘齊齊入閘,全日全部人唔可以離開鋪頭,連Lunch 同Dinner 時間都無,只可以喺公司入面叫外賣或者帶飯,輪流食。

點零鐘有人問我叫唔叫外賣,點知叫完輪到我食都三點,飯盒都凍哂,食咗十分鐘就有人入黎問我食完未,仲有幾個人等緊食飯叫我食快D。全間舖十幾廿人得一格廁所,想去廁所蛇王都去唔到超過3分鐘。晚餐時間亦同樣係咁。

終於等到收工,番屋企想同老婆呻下,點知佢已經同D仔女一齊鎖埋房門訓咗。我又一如以往開套咸片睇下訓廰又一日。

我以為入到去有阿強照,點知佢唔係呢間分店做。初初入到去做只係打雜,可能由於我係老野(喺班後生眼中)加上比人傳開左我係大學生,佢地只有點我,抹枱抹櫃拎茶呢D全部都係我做。

不過無所謂,我本身係廢,個個廢哥廢哥咁叫我,連飛咗隻蜜蜂入黎都要我捉,我都忍。努力學好D國語,學Sale 野,希望快D過試用期加人工。我唔食仔女都要食,我本住呢個心態去做。

雖然我好正面思想,但我知道我既人生係灰色,仲要之後幾十年都係繼續灰色。

直至我做左兩個月後既一日,我既人生除咗灰色,加左一點點既藍色。

呢一日,我如常番工,我永遠都係第一個到,九點三喺閘口等齊人開閘。同平時唔同既係,今日門口多咗條o靚妹,細細粒,照睇應該得十九歲。

「經理你好~我叫藍XX,你可以叫我小藍,英文名叫Blue!」

呢條o靚妹竟然以為我係經理,不過都係,近四十歲人,有邊個會估到我只係黎做散仔。況且,我已經由三日唔洗頭變為要迫住日日洗頭,有一日朝早趕唔切唔洗頭,差D好似小學生Gel 完頭咁比經理捉去廁所洗。

「Sorry藍小姐,我唔係經理,我叫阿費,佢地個個都叫我廢哥,你都可以咁叫我。」

「廢哥?咁搞笑既你個名?你唔係經理?咁你喺度做咩架?」

佢一口氣問咗我4條問題,我都唔係好識答。其實真正原因係我自閉咗好耐,除左每日同D大陸客講一D我都唔知自己講乜既普通話之外,我都無乜點講過野。

「我都係做Sales,應該同你一樣,不過我都只係做咗兩個月。」

「係?你咁大年紀,我仲以為你應該係經理,或者最起碼都係副經理添!」

我心諗:呢條死o靚妹講既雖然係事實,但未免太過心直口快吧?

結果之後幾日,由於佢既心直口快,加上做野就似一般小妹妹,似乎得罪鋪頭入面唔少人。而我亦都鬆咗一口氣,因為除咗佢之外仲黎咗一個男仔,由於新黎新豬肉,開始分擔哂我打雜既工作,有機會坐下,學下做其他野。

「唔駛怕醜喎,食啦!」佢拎起個叉捲起咗一注麵,半爬喺張枱度,放到我口前。「乖啦,呀。。。。」喺一星期後既一個Lunch,我被編同佢一齊食飯。(我諗主要原因係無乜人肯同佢食)

「費哥,終於都同你食飯喇喎!」除咗第一日同佢傾過幾句之外,我一直都無乜同佢傾過計,甚至無直視過佢。



我坐喺休息房準備打開我既飯盒,打量住岩岩入門口既小藍,佢大約156cm高,應該差少少及肩既頭髮紮起咗一條馬尾,樣唔算靚,不過少女無醜婦,而且入得
黎 做服務性行業化咗妝點都見得下人。細細粒,對眼算係較為吸引,黑色大眼珠閃閃亮的。最吸引人注意的,係經常出現既笑容。

佢坐喺我對面,一手搶過我既飯盒:「睇下你今日食咩先?WA,係咖喱豬扒飯!你好鐘意食豬扒架咩?」

我拎番我個已經凍咗一半既飯盒,無佢咁好氣,開始食我既飯盒。點知佢竟然伸手入我個飯盒入面,拎起呢個四十蚊唔包飲品兼得兩塊細豬扒既其中一塊,放入口。

我呆咗咁望住佢,呢個死o靚妹果然唔識死,唔怪得無人肯同佢一齊食飯。佢食完塊豬扒,竟然仲將手指放入口度損,將D咖喱汁損得一乾二淨。

我本來想開口鬧佢,不過,我係一個廢人。喺屋企做老婆奴,番工做奴隸,估唔到連食飯都要俾o靚妹蝦。我既人生,果然係灰色的。

「做咩咁既面口呀?最多一陣我比番我啖麵你食!還掂我都食唔哂!」佢竟然仲係望住我笑,係純真既笑容,一個無經歷,無負擔,對我呢個中年男人黎講係久違了既笑容。



我無理佢,繼續食我呢盒無咗一塊豬扒既豬扒飯。其實我人生中已經無咗好多野,喺呢度番工連埋撘車時間,近十四個鐘,一星期只得一日假,同坐監無乜分別既時
候,少一塊半塊豬扒又算得係乜。當然,放假對住黑口黑面既老婆,仲怨我點解成日番工唔理佢同D仔女,點解放工唔幫手洗奶樽,點解唔乜乜七七既時候,喺呢度
坐監反而有時望到一D打開心口露乳溝既強國女人,眼精有得食冰淇淋,心靈上亦感覺有少少慰藉。

「登登登鄧!呢個就係小藍專屬藍色杯麵喇!頭先食咗你塊豬扒,比你食番啖啦!」佢淥咗一個合味道海鮮味杯麵,推到我面前。

「食啦廢哥,唔洗同我客氣喎!」

「唔駛喇,我夠飽,你食啦。」由於呢度食飯時間只得十分鐘左右,我已經練成3分鐘可以食一個飯盒,咁起碼仲有7分鐘可以上下網。

我被佢既舉動嚇親,望一望佢,我從佢眼珠中看到自己,再看到佢誠懇既眼神,再加上天真既笑容,令我諗番起我老婆喺未成為我老婆之前,我都曾經喺佢眼珠入面望見過自己。究竟有幾耐我無再喺我老婆對眼入面望見我自己?又或者其實佢眼中已經再沒有我。

我心跳有少少加速,好想張開口食呢一啖麵。究竟又有幾耐我老婆已經無再好Sweet 咁餵過我食野?我記得,應該,成為老婆之後再無餵過。

當然我最後無咁做,企起身去斟水飲。我見到佢先扁一扁咀,之後就拎出佢部電話幫個杯麵影相,之後再叫我幫佢渣機同個杯麵影相,仲問我駛唔駛同個杯麵影張相。我真係被佢搞到哭笑不得。

之後我拎我部電話出黎,諗住上網睇下野,佢就問我有無玩FaceBook,強迫我Add 咗佢。

Add 咗佢之後,FaceBook 第一條彈出黎既更新就係我岩岩幫佢影個張相,寫住:小藍與專屬杯麵@今天的午餐^_^ 藍色就是我的標記

望住呢張我岩岩幫佢影既相,望住佢拎住個杯麵嗰種笑容,我諗番起我同女友(即係依家老婆)以前都係咩都影一餐。又感慨究竟由幾時開始,我地連相都無再影過一張?

準時十分鐘後,又有人探個頭入黎睇下我地食完未。當然我地立刻識趣起身讓座出番去開工。


自此之後既一個月,我都經常被編同小藍一齊食Lunch同Dinner,亦經常要幫佢同佢帶黎既唔同食物影相,例如巨大蕉型雪條、一大包夾糖、打邊爐定

BBQ食淨既牛丸魚旦等等,而佢食得最多既,就係M&M,每日佢都會買包M&M番黎,總會先揀哂所有藍色,數下總共有幾多粒。相比我日日

食飯盒,佢的確係多采多姿。唔知係咪對得年青人多自己都感覺年青咗,漸漸地被佢既天真可愛感染,開始有同佢傾計。正如之前對佢觀察一樣,佢一D機心都無,
心直口快,講好多連我聽到都覺得尷尬既野。我亦都慢慢有講出我自己既事比佢聽。

「吓?你晚晚番到去你老婆已經鎖埋房門訓咗?咁你地淨係放假先搞野呀?一星期先搞一次?」小藍露出驚訝既神情。

「無搞,對上一次應該係前年聖誔,再上一次應該係搞到有左個女嗰次。」我平時唔會將呢D野同人講,但今日唔知點解我講咗出黎,仲要對住女仔講。講完我有少少後悔。

「唔係掛?你老婆咁樣你都忍?」

呢樣都未算慘,我都未敢講我自己解決都要比人搵野掉。

「算啦,你仲細,呢D野你都係唔明 。」

「咩呀?我廿四歲架喇!」咩呀、碌大對眼、扁咀,係佢既口頭蟬同常用表情。

「噢?乜你原來咁大,我以為你得19歲。」

「咩呀?個樣生得後生D唔好咩?」

一個月黎,我地差唔多每日都有二十分鐘二人共對時間,一邊食飯一邊吹水。另外經理唔喺度時,我地都會間唔中吹下水,不過人多喺鋪面我通常都唔多講野。

雖然佢無論樣貌身型性格都真係一個小妹妹,但佢既天真同孩子氣,的確令我呢一個月番工如坐監既生活帶黎一點點色彩。

呢一個月過去,亦都係我喺度做咗三個月,終於過試用期,加咗少少人工再有番佣金,努力喺度坐監同講國語既生活,總算無白廢。

小藍之前講過,話鐘意食Pizza,但平時無理由自己買個Pizza黎食,一直叫我同佢Share,我都無理過佢,繼續叫我既飯盒。

到今日我過咗試用期,經理話循例過試用期就要請食Tea,為咗答謝小藍呢一個月都算陪我,我決定話叫Pizza Hut。

小藍知道之後極之開心,仲話如果唔係經理喺度佢會過黎攬住我。

佢今日既FaceBook 亦加咗同Pizza既合照,寫住:

費哥竟然記得我想食Pizza ~^_^~ 多謝哂!希望快D到我過試用期啦!

放工之後我第一時間打俾老婆想報喜,點知佢一聽電話竟然即刻鬧我,話我做乜咁夜仲打電話黎嘈醒佢同對仔女,知唔知依家幾點咁話。

我即刻火起同佢搏火話我依家先收工,你晚晚唔等我番黎鎖埋門訓都算,開心想打個電話同你分享你仲鬧我?

佢竟然話我痴線之後仲Cut 我線。我真係好無奈。

我喺度諗點解我人生會係咁悲慘。咁辛苦番工都係想做好本份養家,但老婆仔女都係當我無到,不如我依家沖出去比車車死咗佢,咁佢地都有一大筆保險可以過世。

就喺呢個時候,後面有人拍我個頭,原來係小藍。

「費哥你仲唔走既?企喺度做乜?」佢番工時經想恰眼訓,但係放咗工個樣仲好精神,同我完全相反。

「無,岩岩又比老婆無理取鬧咗鑊啫,慣架啦。」

「咪咁啦,請你食!」唔知佢喺邊度買到袋雞蛋仔出黎,岩岩新鮮熱騰騰的。

「多謝你!」當谷到一肚氣既時候,有人安慰你,其實已經好窩心。

我一邊食住雞蛋仔,一邊沿住彌敦道行。平時會喺尖沙咀警局門口附近等巴士,不過今日既心情,我更加唔想番屋企,於是我繼續行,入咗九龍公園。

小藍一直無出聲跟咗喺我後面,照計平時佢應該會不斷講野,初初我都以為係因為驚我話佢煩唔敢出聲,於是我回頭一望,我見到佢有失落既神情。

但當我地眼神接觸的一刻,佢就即刻回復笑容。

我行入呢個好多年無行過既九龍公園,回想以前同老婆拍拖年代都曾經手拖手到過呢度。

「係呢?你成日入黎呢度行架?」小藍突然間問呢條咁既問題,打斷咗我思路。

「都好耐無行過公園喇!」自從結婚後兩個星期就知道有咗BB 開始,我已經無同老婆去行過公園。

「我同我男朋友以前都成日行公園當拍拖。」

「咁依家你都可以繼續行架!黎公園好丫,靜靜地拍拖又唔洗錢。」

小藍無出聲,竟然行過黎挽著我的手。

「你...無事嘛?」我想縮後,但係佢兩隻手咁挽住我,令我縮唔開。

「無事,我只係想你陪我行一陣公園,可以嗎?」

我唔知點拒絕,其實我都想有人陪我行一陣公園,重拾我以前既感覺。

我望住小藍,我覺得佢有D似後生時既老婆。佢一路挽住我手行,我心跳有久違了既加速,我好想將我另一隻手撘上佢膊頭度,但我唔敢。

我地一路行番出去清真寺嗰邊出口,再一齊等巴士,佢架車到咗,就鬆開我隻手排隊上車。

差不多到佢上車時,佢竟然一個轉身行埋黎鍚我一啖,再用佢招牌笑容望住我講聲拜拜。

我呆咗。三十幾歲人,如無記錯應該係第三次同女人拖手同鍚。第一次係老媽;第二次係老婆;第三次係佢,小藍。

我一路撘巴士一路諗,究竟我咁係咪算出軌?算婚外情?

應該不算吧?

番到屋企,全屋燈熄哂。我想入一入房望一望老婆仔女,但一如往常的鎖住房門。我連想望一望佢地內疚一下既機會都無。

沖涼後,又一晚,做廳長。

雖然我表面上有一個幸褔家庭,但其實我既生活,可以用陳奕迅首「他一個人」黎概括:

他看戲 也一個人看
他放假 也一個人放


(我好少聽歌,本來唔知呢隻係咩咩歌,係當我WhatApps 同朋友講我一個人去食飯睇戲時,佢地不約而同打呢幾句歌詞比我同Send 俾我聽的)

無錯,每次我放假,雖然好累,但都有心情想同老婆出去食飯。可惜老婆往往話要照顧仔女,唔肯出去,但同時亦都唔肯煮飯比我食。

我番工已經日日兩餐飯盒,無理由放假仲喺屋企食飯盒,於是訓醒就會一個人出街食飯。有人話一風堂好食,我就自己一個人去食拉麵。人人話一風堂等位要等成個鐘,但我一條友去佢比我直入。睇住門口既情侶,望住我一埋去就可以入去時嗰種表情,就覺得其實一個人有一個人既好。

食完碗拉麵的確係幾好味,但可惜唔夠飽,於是就走去元氣食壽司,同樣地,一條友又係唔洗等位,食咗幾碟埋單又可以走人。



行行下見到有夾餅賣又好似幾好食,買一個再行去朗豪坊買張飛睇戲,全場爆滿但係全戲院正中間又有一個位零零丁丁咁空咗出黎,好明顯係留比我坐既一個位。入
場
既時候見到左右兩邊兩對情侶用怪異眼光望實我,可能佢地心諗係特登咁揀位無人會坐,遇著我算佢地唔好彩,唔好以為一個人係無女既宅男毒男專利,結咗婚依然
一個人,唔洗紅紅黑,我用灰色更加霸氣盡顯,就係咁簡單。

我知有人會問,乜你唔係話自己好慳架咩?無錯,我以前的確係好慳,但做咗呢份工之後,簡直係無人生。我終於明白點解D港女Sales點解搵咁少錢仲要買LV,點解依家D後生仔欠卡數都要去日本旅行。辛勞既工作之後難得放假,係絕對需要放鬆一下自己。

點解我要有咁既生活?連我自己都唔明。

你地點樣想像自己既人生?

年青時,我已經無好大的要求,希望畢業搵份普普通通既工,努力養妻活兒。

放工番黎老婆煮定飯等我,食完飯我幫手執碗入廚房跟住佢洗碗。

我有我打機,佢有佢睇劇,由於打機時間耐過睇劇,佢睇完就整個生果餵我食,再陪我打陣機。

跟住好溫柔我叫我聲老公,快D打埋機一齊沖涼入房覺覺豬。

可惜一切只係幻想。

我番到屋企既時候,全屋既燈已經熄哂,只係電腦面前貼住一張老婆寫既紙仔:

「你洗埋奶樽倒埋垃圾先好訓」

今日番工小藍同平時一樣無乜異樣,而食冕我亦無被編同佢一齊,不過咁都好,如果唔係我都唔知同佢講乜。前日發生既事,感覺好唔真實,就好似發咗一場夢,點解小藍咁做,我始終未諗到。

食晚飯既時候終於避不過要同佢一齊,而且呢排通常大家晚飯都係咬個包當休息十分鐘就算,食得飯盒多都厭,寧願等放工先走去宵夜。

「費哥!我想申請信用卡呀!但我唔識填,你幫我填啦,申請邊張好呀?」小藍拎住一堆信用卡申請表放喺我面前。

「呢張啦!我都有,推薦人仲可以多張百佳Coupon。」
「好啦,你幫我填啦,我拎身份證嗰D比你!」

我喺度幫佢填既同時,小藍走到我身後,攬住我。

我嚇到成個人彈起身,差D成張枱都整爛。

「喂!你喺度做乜野呀?」除咗個喂字大聲咗,其他字我都壓低番聲線,廢事出面同事聽到走入黎。

「咩呀?見你幫我填表咁辛苦,我又幫唔到你,咪過黎攬下你幫囉。」佢喺枱底申咗個頭出黎,用佢招牌大眼同笑容望住我,仲伸脷。

「傻咗咩你,呢度公司黎,而且.....」其實我仲未搞清楚佢點解咁做,公司都算有幾個後生靚仔,無理由會鐘意我呢個中坑。「而且好似有閉路電視,你係咪傻咗?」

「咩呀?尋日佢地話呢度個閉路電視壞鬼咗,喺度講話喺度做乜都得呀!我咪諗住試下囉!」



「痴線,一陣比人見到點算?唔好玩啦!」

跟住我就走咗出去廁所,用清水洗個面,冷靜一下。

之後連續三晚,我都發夢我同咗小藍一齊。


我
唔知自己算唔算搞緊婚外情,我唔係好識點樣面對我老婆(雖然都唔洗點面對),番到公司又唔知點面對小藍。我唔知其他有婚外情既人感覺係咪同我相同,但我又
唔敢將呢個秘密同人講,因為唔知邊個話過出賣自己既人其實係自己,因為係你第一個將秘密話比人知的,連你自己都守唔住自己既秘密,你又憑乜要人幫你守。

雖然我老婆咁對我,但其實我仲係好愛我老婆。身邊朋友會稱呼佢地D老婆做老虎、老虎乸、屋企嗰隻野、肥婆等等,我無。無論佢點,我都依然會叫佢做老婆。

我知好多人等緊睇我同小藍,但我突然諗起我老婆。

廿幾年前,我已經係個毒男。中學時期已經迷上睇日本動漫,嗰時無依家咁幸褔有得上網有翻譯,所以我就走咗去學日文。



基本上由中一到中六我既生活都係毒男生活,番學放學睇漫畫睇咸書打機(或者間唔中偷老豆咸帶睇),身邊同學會拍拖會失戀我通通都無份。番學時期個Look
都係維持住幾日洗一次頭同埋無剃汗毛,無女埋身都好正常,不過I Don’t Care,因為我對學校D女都無乜興趣。

升中六後,總要做D咩學生會咩咩學會會長幹事,如果有得比我揀,我當然會做動漫學會或者AV學會。現實當然無D咁既學會,而我亦都無得揀,被逼咗做學生會咩統籌內務副主席咁上下既野,我完全唔知係乜黎,而我都無乜做過野。

直至到聖誕聯歡,主席話要佈置場地,而佈置呢D野就係內務野就由我做。我話唔係呀嘛?我一條友佈置哂成個禮堂?佢話會叫外務副主席出張海報貼喺學校叫有興趣義務幫手既同學黎聯絡我。

結果曾經有十幾廿個人黎報名,不過多數女黎咗班房望下我就話都係唔得閒。結果最終只得小貓三四隻幫手,而我老婆就係唯一一個女仔。



當年佢個樣係點我都唔太記得,我想入房搵本相簿出黎回億下但你地都知我入唔到自己房。我印象中應該同佢依家差唔多樣,戴眼鏡長頭髮瓜子口面咁。

佢美術好有天份,最終差唔多成個場既佈置都係佢設計同完成,因為好多時候佢話我越幫越忙叫我坐埋一邊就得,我就坐埋一邊睇下漫畫間唔中幫佢拎下野咁。

而我亦第一次對現實世界既女仔抱有期望,當時我覺得如果將來有個咁既老婆幫我搞掂哂D野都唔錯,咁我可以專心打機睇漫畫,人生就幾圓滿。

結果喺我唔記得我點媾佢既情況之下,我地好自然咁喺埋一齊。佢做咗我初戀女友,亦都係呢生人唯一的女友。

「費哥,食唔食蕉啫?」小藍咬咗半條蕉隊過黎問我。
「唔食喇,你自己食啦!」其實嗰日之後,小藍又好似無乜異樣。

經過一排時間,同事們都已經習慣佢既爽直,佢同D同事已經熟番,好多時打成一片,而我同佢單獨共處既時間亦都減少咗。

我無問佢點解會咁對我,當然我更加無問其他同事小藍有對佢地咁。有時又諗,其實嗰日係咪都只係我自己既幻想,根本從來無發生過呢件事。

日日番工十幾個鐘加上無性生活亦都無乜得見老婆仔女既日子,真係好燥。

小藍甚至會喺女同事面前講:「你地唔好激廢哥呀,佢好耐無咩谷到行哂好鬼燥,你地再激佢小心佢過黎強姦你!」

我都唔知好嬲定好笑。

有一日我放工番到屋企先發覺原來無帶鎖匙,但無論我打電話、定係大力拍門,我老婆都係無理我。

初初我真係好嬲、好炆,跟住就好無奈、好灰。我坐喺自己屋企門口,諗起我一直以來努力搵錢就係為咗入面三母子有瓦遮頭、有三餐溫飽。而我,番咗十幾個鐘工,卻連屋企門口都入唔到。

我老豆老母度係有我屋企後備鎖匙,但我唔想上去驚動佢地兩老。老豆老母養大你,見到你娶個好老婆,就係佢地最大安慰。所以佢地從來唔知道我同我老婆關係惡劣,佢地一直認為我地兩公婆係好恩愛的。

不過呢個只係我自己的一相情願。

有一次老婆喺廁所同個女沖緊涼,個仔百厭,我打咗佢兩下,並無用任何武器,就只係用手打兩下,個仔就喊。

細路仔百厭比老豆打打完就喊呢樣野普通到無得再普通,點知我老婆一聽到個仔喊就喺廁所沖出黎,問個仔咩事,個仔喊住咁指住我。

我咪話佢頭先喺度倒亂差D整爛哂D野,我叫佢唔好佢都唔聽咪打佢兩下。老婆一聽到我話打咗佢兩下,唔理三七廿一就係咁鬧我痴線問我係咪有燥狂症定精神病打佢個仔,夠膽就殺埋佢咁話。

我真係好無奈咁同佢講我真係諗住打兩下教下個仔咋喎,而且都唔係大力打,我有就住力,你睇連紅印都無個,佢都係撒下嬌。

結果我老婆就攬住個仔入去廁所攬埋個女一齊喺度喊,話我對佢地母子都唔好,之後仲打比我老母投訴我。我老豆老母即刻趕哂過黎,佢地老人家實係幫住個孫就省我一餐叫我以後咪打仔。

從此之後,除咗我無做老公既威嚴,連做老豆的都無埋。

嗰晚我入唔到門口,又諗唔到有咩其他方法,於是就WhatApps 向我D朋友求救。點知班友仔無收留我既意欲,淨係識叫我去搵條女過下夜,仲Post 咗個數字網比我叫我上去搵,幾舊水包埋房過夜有條女dup埋骨。

人大咗就係咁,我唔係無朋友,同我WhatApps 嗰幾個亦係曾經共富貴共患難既好兄弟。但有朋友又可以如何?每個人都有自己家庭,聽朝亦要一早起身番工,難道要叫人出來陪你坐街坐通宵?

我就去佢地Post D Link 睇,D女真係有咁大波得咁大波,有樣有相仲有埋片,對我呢個就谷到爆既男人黎講真係極之吸引。

但我真係好怕Dirty,我連老婆仔女既口水尾我都唔鐘意食,更何況係陰唇萬人嘗既妓女?




同我WhatApps呢幾個朋友係喺網上因炒股票認識,由買藍籌變炒細股到牛熊窩輪期指期權,由港股直通車到金融海嘯,由有望提早退休變做打回原型我地都
一 齊經歷過。曾經日日贏幾皮對世界充滿希望呢種感覺,跟我同我老婆戀愛既感覺一樣已經煙消雲散,就只會再存在在幻想之中。

我好少將自己既家事話比中學或者大學同學聽,一來佢地比事業上已經比我有成就,我喺佢地眼中,有層樓、有對仔女算係比佢地美滿,我唔想連呢樣喺人地眼中既好印象都無埋。

再加上佢地既老婆大多唔鐘意我,認為我成日會毒佢地老公打機。有一次我大學同學結婚請飲,我從未見過新娘,但當個新郎介紹我比新娘識,新娘第一時間就話:「哦,你就係嗰個廢哥呀嘛?你咪再成日叫我老公打機喇!」

而嗰個朋友最後一次搵我,就係話我知佢生咗仔之後,佢老婆收埋咗佢個Xbox個手制。佢每月上繳人工後淨番既零用錢,如果用黎買個新手制買隻Game會好責使,加上再買佢老婆都係再沒收,所以想喺呢幾日佢老婆同外母要番鄉下時借個手制同借隻Game玩下。

可惜喺嗰日之後,我同呢個朋友已經失去聯絡,當我試圖聯絡佢時,係佢老婆聽電話,叫我以後唔好再叫佢老公打機,搞到佢嘈住個仔訓覺。而我呢個XBox手制同隻Game,就唯有當係送我朋友遊戲生涯最後一程。

所以我好多事就轉為同我呢幾個網友傾訴,久而久之,佢地亦成為我人生中的好朋友。

最重要我同佢地熟既原因,係因為佢地比我細幾年,我睇住佢地拍拖、失戀再拍拖,準備結婚儲錢買樓甚至開始生兒育女,就好似望住十年前既自己一樣。

十幾年前同女朋友(即係依家老婆)岩岩一齊既時候,佢依然仲係好細,我地拍拖係非常純情,最大的身體接觸也只限於拖手仔。

由於係同一間學校,每朝會一齊食早餐,Lunch時亦都一齊食。嗰時我地都無乜零用錢,朝早都係買一排大排包兩份分;佢本身細細粒,食量唔大,所以中午時就去快餐店叫一個學生餐多飯就可以兩份食。放學既時候一齊慢慢行番屋企,多數我送佢番到樓下,佢見我累時就會佢送我。



放假去街亦都以平為主,去公園影下相,睇下花花草草咁又一日。特別日子我地亦都唔會浪費太多錢去買禮物,反而會自製小禮物,用心思撘救,至今我依然收埋佢送比我的小禮物在老家,我唔知佢係咪一樣,有留住我親手為佢整的小禮物。

第二年我就要為高考努力,我知道自己唔係叻,所以更加應該讀書,同佢既節目變咗去自修室溫習。結果我順利考入三大,女友為咗慶祝我如願以償,加上奬勵我咁叻,就喺學校附附一個公園,獻上咗佢既初吻,同時亦都奪去咗我既初吻。

除咗美術之外,佢學業成績唔算太好,但自此之後佢一直以我為目標,希望可以同我一樣考到入大學。我大學時期亦都開始努力幫人補習搵零用錢,亦都為儲錢為畢業唔洗欠債咁多。為咗幫佢追上學業進度,有剩餘時間就陪佢一齊讀書。呢種關係一直維持到佢考完高考為止。

佢完成高考,加上我儲咗小小錢,我地去我地人生中第一次旅行 - 長洲。



我地一齊租單車,去搵朋友同學們推介好吃的特色長洲食品;我地手拖手漫步海灘睇日落;夜晚我地相擁著看天上的星星,驚訝長洲的星空比市區更多星更明亮。最
後,我地撘尾班船一起回家,回程船上佢話當日係佢呢生中最快樂既日子,可以搵到一個叻既男朋友,簡簡單單既生活已經好幸褔了。

幾年前,我喺呢班細我幾年既朋友眼中,睇到我以前既影子。

年少多好。

有人只係由簡簡單單的打羽毛球開始就拍拖,初初拍拖亦都只係每個星期去打下羽毛球。不過當過咗幾年,就慢慢開始傾到談婚論嫁,傾到錢、傾到禮金就開始有唔開心。

有人只係帶女朋友去食一餐自助餐,佢女友就已經開心到不得了仲獻出咗第一次。可惜幾年後無論佢點再搵好餐廳去食,女友都只係嫌無乜新意兼發脾氣。

男人鐘意年輕女孩子,其實原因並唔係因為單單膚淺的年輕貌美,而係純情純真。

做完某件事,可以得到身邊那位認同,令她快樂。男人就是喜歡這種滿足感。



18歲既時候去食一餐自助餐可以樂透半天,28歲帶佢上山頂亦都無感覺。
18歲買一個毛公仔比佢做生日禮物,到28歲買半卡鑽戒亦都嫌細粒。
18歲去長洲都開心一個月,到28歲去日本都覺得係應份。

而我,無論18歲、28歲定係38歲,我都只係想開開心心打下機,簡簡單單的生活。

係女人變得太快定係男人唔識改變?

老婆婚前婚後既變化真係好大,而我,其實都有變化。

我以前鐘意打RPG化身為勇者拯救世界,依家轉玩忍者外傳化身忍者斬殺全世界。

諗到呢度,我忍不住在自己家門前流淚,我真係好想老婆突然間開門,陪我落一次公園。

那夜凌晨,我在和我老婆初吻的回憶公園中,獨自坐了一晚。

「嘩,費哥你咩事呀?」小藍見到我疲累的表情來問我。
「無野,尋晚唔夠訓啫。」難道我告訴她我昨晚坐在公園一晚嗎?
「咁不如我幫你按摩下啦!」小藍行去我身後。
「唔洗喇,我恰一陣就得」
「你合埋眼休息下,唔洗理我架!」小藍喺我耳邊輕聲講。

小藍溫柔咁幫我按摩,由頭開始,到頸,再到肩膀。

好舒服。好耐無試過按摩的感覺了。

迷糊間我聽到佢講:「今日經理無番,你訓多陣先啦,我出去同佢地講你唔舒服。」

大約過咗半個鐘後,我就醒咗出番去做野。

小藍行埋黎我旁邊問:「點呀?好番D未?我手勢係咪好好呢?HEHE」仲笑得好甜咁望住我。

「恰咗陣好番好多了,唔該哂!」

「咁就好啦!今晚番去早D訓喇!」

「我會架喇!」好彩提一提我,我仲未拎番鎖匙。拿拿聲打老婆叫佢今晚等埋我門先好訓。

「咁鬼麻煩架你,咁大個人仲唔記得帶鎖匙!」係係係,全世界最麻煩係我。而佢似乎都無發覺我尋晚係無番過屋企。

終於捱到放工,等巴士時小藍走埋黎我耳邊講:「記住抖足精神呀!下次同你去九龍公園~~~或者再按摩過!」之後望住我奸笑一下,我未及回應,佢就轉身走了。

番到屋企,燈火通明。好耐無試過一日番屋企一打開門口就見到老婆仔女。如果每一日都係咁,我番工捱得幾辛苦其實又有乜所謂。

「咁大個人連鎖匙都唔記得帶,旨意你就死!」
「唉,我一日番12個鐘頭工,累架嘛,唔記得帶啫!」
「我日日做足24個鐘仲辛苦過你呀!又唔見我唔記得餵奶?」
「係係,最辛苦係你喇老婆。算啦,我地唔好嘈。不如今晚我地一齊訓?」
「訓乜鬼,張床又唔係大點訓四個人?」
「執番好佢地間房D雜物叫佢地訓番自己房啦!」
「佢地一定要痴住我先訓得著,唔係又成晚喺度喊!」
「。。。。。。」
「咁不如陪我一齊沖涼,順便。。。。」
「咪又痴線,我都好累,訓喇早抖!」

「咁不如後日我放假去長洲行下啦!」
「後日要同個仔去上Course,你放假岩喇,你接囡放學啦!」

我放假當日,老婆一早起身就叫醒咗我,叫我記得去接個囡放學。

我去幼稚園門口接佢放學,之後帶咗佢落去回憶公園,拖住佢隻手。望住識行但仲會間唔中跌跌撞撞既佢,我覺得佢好似我老婆。唯一唔同既係,老婆只會對住我黑面,而個囡只會望住我笑。我忍唔住,鍚咗佢一啖,錫完佢之後佢就會用更加甜美既笑容黎望住我。



見佢玩到滿頭大汗,我叫佢過番黎,鍚爸爸一啖,佢就即刻過黎鍚我一啖,真係好Sweet;而我老婆,連比我鍚一啖都唔肯。

去完公園玩,我就帶佢去茶餐廳,點咗我最鐘意食既雞脾薯條西多士加雪榚紅豆冰同佢兩份食。就好似以前同老婆食一樣,一人一啖,我地兩個人都好開心好滿足。

呢一日過得好開心,時間亦過得特別快。我諗住第時每次放假,都唔再一個人過,而改為帶仔女一齊落黎食下午茶,最好老婆都一齊去。

我喺度諗,老婆咁緊張個仔,係咪都因為個仔似我?而佢將對我既感覺投放哂喺個仔身上?

之後幾日我番工心情都好好,因為諗住可以快D再放假就可以再同家人一齊去食下午茶。

而呢個時候,我電話突然震,一望之下原來係老婆打俾我。番工時間,老婆好似從來無打過俾我。

好彩無乜客,我即刻沖入廁所聽電話。

「你早兩日同個囡做乜黎呀?」我都估到唔會係打黎問候我工作順唔順利。
「咪接佢放學,去公園玩咗陣,之後食野,之後番屋企囉。」
「你帶佢食乜黎呀?你搞到佢唔肯食飯係咁話要見爸爸。」
「咪以前同你食開下午茶嗰度囉!」
「你知唔知你亂咁比野佢食,搞到佢唔肯食飯呀?叫你做少少野都做唔到,以後真係唔敢再叫你湊佢!」

我想再答佢前,已經被佢Cut 線了。
我點解係做少少野都做唔到?
我都係只想一家人開開心心,食個雞脾餐都有錯?

放工後,我一個人在呆等巴士。

小藍又在後面拍我的頭。



「費哥,今朝見你好似好開心架,聽完個電話又做乜變咗咁既樣呀?」開心同唔開心真係呃唔到人,我既表情出賣了我。

「唉,老婆就黎連個女都唔比我見!」
「下?點解咁既?」佢喺手袋入面拎咗排M&M出黎。「唔好咁啦,請你食粒藍色M&M,你知唔知藍色係最好食架?」
「唔知點講。」我真係唔知點講好。
「唔好唔開心啦,不如我陪下你?」佢又碌大對眼,笑得好甜咁望住我。
「咁你可唔可以陪我去公園行一陣?」其實佢有D似我個囡;唔係,應該話係似我老婆仲係女友既時候。

「好呀!」佢望住我笑,之後一手拖住我拉我向九龍公園方向。

呢一刻,我有少少想借小藍,想尋回一些同老婆以前一齊行公園既感覺。

特別係嗰晚我一個人獨坐在公園之後。

我一路發呆咁行入公園,而小藍一直挽著我手臂。

一路行佢一路問我:「點解你同老婆關係會咁差架呢?」

我嘆咗一口氣,無答到佢。實際上我自己都無認真諗過,究竟由幾時開始同老婆關係轉差。

「其實你地都係性生活唔協調先會變成咁架啫,係咪呢?」
「咁以前呢?以前你地係咪都無乜咩架?」
「做乜唔出聲呀?」
「有咩你可以同我講架喎!」

「小藍,其實我想知點解。。。點解你會咁對我?」可能由於心情差,反而有勇氣問平時唔敢問既問題。

「我知你會諗,我係咪一個好隨便既女仔?」小藍跳上欄杆坐了上去。

我無出聲,等佢自己繼續講。

「咁你估呢?」佢又望住我笑。

「我。。。。唔知。」唔通話係咩?

小藍從欄杆跳番落黎,行埋我身邊,攬住我。喺我耳邉問:「如果我話唔係,你會唔會信我?」

我雙手捉住佢膊頭,推開佢一步,問:「咁點解。。。你要對我咁樣?我又唔係有錢,更加唔係靚仔!我唔明白。」

「嗯~」佢頭望天,諗咗一諗。「其實我覺得你係好男人,但我又覺得你成個人好憂鬱咁。我都唔知點解,但我好想令你開心,想滿足你。」

「但係我有老婆仔女,而且你都有男朋友。。。」

「我無諗咁多,我唔係想破壞你家庭,更加唔係想要你離婚,我真係。。。真係只想令你開心。」佢喺捉住我隻手,鍚咗我隻手一啖。「我真係唔介意,我亦都無諗過以後會點,淨係呢一刻,我想令你開心。」

我無出聲。

「我真係無企圖,唔需要對我負任何責任!」佢更加用由攬實我。

「Sorry,太突然,我想冷靜下。」我拉開佢對手,自己退後了幾步。

小藍露出佢招牌笑容望住我:「好啦費哥!總之你記住有咩需要就搵我!記住,小藍會喺你身邊支持你架!」

之後佢轉走就走,背住我揮手講咗聲拜拜。

我其實仲有好多問題想問小藍,但又唔知從何問起,亦都問唔出口。

我有諗過問下朋友,但亦都唔知點開始講起。而且我大概預計得到佢地既回覆只係「你就爽啦!」、「有食唔食罪大惡極」、「美女廚房,食咗先講」等等。根本我唔會想得到我希望得到既答案。

而我希望得到什麼答案?我自己都不知道。



回到家中,再一次看著黑透了的家,緊緊鎖著的房門。

我知道我老婆仔女就只在一門之隔,我只要拍門,或者去找找房門的後備匙,我就可以見到他們。但我和老婆心與心之間的阻隔,又豈可以靠一把後備鎖匙去開啓?

呢一刻,喺呢間屋入面呢個氣氛,令我好想出露台望向街,開一罐啤酒,抽一口煙。可惜我不喝酒也不抽煙,最重要的是,我家中並沒有露台。

之後幾個月,我都係繼續一直以來既生活,朝早起身番工、等放工、夜晚獨自喺電腦面前上網、間唔中搵套AV望下。放假既時候想陪下個囡玩,但佢都好似嬲咗我唔再帶佢去食雞脾而唔睬我。結果,我又回復番一個人出街、一個人食飯、一個人睇戲既生活。

番工既時候,小藍依然間唔中挑逗下我,而每次見到我唔開心,亦都會請我食一粒藍色M&M。我地保持住呢種挑逗與被挑逗既曖昧關係,無再進一步。慢慢地我已經習慣彷彿同佢打情罵悄般既生活,我諗呢個係我捱得過喺舖頭每日十二小時既原因。

聖誔之前幾日,公司搞聖誕聯歡會,全部分店提早兩小時收舖。所謂聯歡會,其實只係公司高層自娛既節目,唱歌跳舞,再拎D錢出黎抽獎,我只會諗起歡樂滿東華。

我唔知有無人鐘意去現場睇淨係得總理而無明星既歡樂滿東華,但至少我唔鐘意。整晚我都坐在阿強隔離同佢聚舊傾計,當我偷偷望隔離枱既小藍,竟然發現佢睇得津津樂道,仲笑得好開心,喺台下跟住台上面高層一齊唱歌。

乜都笑一餐,乜都全程投入,係小藍既優點;應該話,係年輕無煩惱女孩子既優點。喺我呢個中年男人身上、喺我老婆身上,都已經再無辦法搵到。

喜劇之王入面有人想用千金買初戀,但我知道初戀呢種感覺,其實一世都不可能再買回。就算搵到對方係純真的初戀,也只可以睇到、望到佢發自真心既開心,卻不能真真正正從內心感受得到。

失去了便是失去了,過去的就是過去的。我老婆的靈魂,或許已經一早就跳了入仔囡的體內。


聯歡會後,我同阿強道別後各自離開。我行去前面巴士站時,見到小藍坐咗喺路邊,睇黎佢應該係飲醉酒。

「點呀,你無事呀嘛?」我行上去扶起佢問。

「咦~你咪費哥?頭先唔見咗你既?同我飲呀!我地再唱歌!」小藍已經醉到有點語無倫次。

「你得唔得呀?番唔番到屋企?洗唔洗打電話叫你接你呀?」

「無呀!我想~~~~~」未講完,佢就暈倒在街上。

本來我想搵佢部電話再叫佢屋企人黎接佢,但喺條街度好多人望住,我都係決定先送佢上的士。

上次幫佢申請信用卡時,記得佢地址,我就向的士司機說出目的地。

的士上我喺佢手袋搵到佢手提電話,不過通訊錄中無爸爸媽媽等類似的電話。

我有諗可能佢係同佢男朋友住,但我又唔知佢男朋友叫咩名,來電記錄中又未能發現邊個先係佢男友。

如果我抱住佢上樓,一開門比佢男友見到,好可能聽朝就要上頭條。但都無辦法,佢一直都無醒,的士到佢家樓下,唯有硬住頭皮抱佢上樓。

小藍屋企都好亂,衫褲鞋通地都係,而枱上面更加有幾個食完的藍色合味道杯麵。

我將佢放咗喺床上面,諗住走既時候,小藍醒咗,捉住我隻手。

「唔好走。陪我一晚。」
「你無事嘛?洗唔洗沖杯茶比你?」
「唔洗,我淨係想你陪我,一晚咁多!」佢捉住我手借力,令我坐咗喺佢張床上面,而佢半躺半坐的抱住我。
「你醉喇,訓下先啦,乖。」我鬆開佢對手。

「我無醉,你係費哥,我知道!」小藍開始將自己身上既衫除掉。「我淨係想要你一晚,就一次!今晚之後,我唔會再煩你!」

我即刻拎轉頭唔敢望佢。(雖然都有少少想望)

「唔好咁講,我地永遠都係好同事好朋友嘛。」的確,我都已經習慣咗有佢做我的好同事。

「好快我就陪唔到你喇!我想,我地會開心一晚。」

魔鬼同天使就好似電影般分別在左右耳勸我,做,唔做,做,唔做。

「唔洗喇,你都係醉,你早D抖啦!你聽日放假,可以訓冕D。我走喇,拜拜!」

最後我都係過唔到自己心理關口。

之後嗰日小藍放假,我如常番工,再之後嗰日就到我放假。

第三日,亦係平安夜,我番到公司時,同事們告訴我,小藍昨天已經辭職,即時生效。

我有點愕然,我想打俾小藍問佢係咪因為我而辭職,但我無勇氣打。無論佢答案係點,我都好似好難面對。

中午食飯時候,只得我一個食,無咗小藍喺身邊,確實有點不習慣。

食完飯後,我打開自己櫃桶,我發覺有一個用玻璃瓶裝滿,全部係藍色既M&M,仲有一個淺藍色信封。

信紙亦都係淺藍色的。

費哥:

  我係小藍,對不起我對你不辭而別。我知道你想問,我辭職係咪因為你。答案係....你睇哂落去咪知囉 ^_^

  我好似無話過我自己身世你知,其實我係生長喺一個單親家庭。正式D講,我父母無離婚,但我一直都只係跟住我媽媽。

  我爸爸同媽媽喺我細個時就移民加拿大,細個既事我都唔太記得了,大約係因為我爸爸只係掛住做野,冷落咗我媽媽,我媽媽就帶我番咗黎香港。


 
 細個既時候我覺得爸爸唔理我地兩母女,每個同學都有爸爸媽媽一齊,我就無爸爸,所以我好嬲佢。而我媽媽成日唔開心,但每當我對住佢笑既時候,佢就會開心

番。慢慢地我就養成要成日笑既習慣,我好希望自己既快樂,可以感染身邊既人,令到大家都咁開心。我媽媽經常同我講,只要有小藍喺佢身邊,有小藍對住佢笑,
就已經足夠。

  但早幾個月,我發現爸爸每個月都一直有入錢去我媽媽戶口,雖然我地已經無見面,但原來我爸爸一直都有喺金錢上照顧我地,亦都解釋到點解媽媽可以一直都無做野只係全程照顧我。突然間我覺得我咁多年黎錯怪咗佢,覺得其實爸爸都好偉大。

  第一次同你去九龍公園之前嗰日,我同男朋友因為嘈交分咗手。我男朋友終日只顧吃喝玩樂,亦都唔多願意番工,我覺得佢好無用。我爸爸一個人喺外國都竟然繼續養我同離開咗佢既媽媽,但佢竟然只係識得玩。

  見到你,令我諗起我爸爸。咁多年黎我同媽媽都無好好陪過佢。有時我覺得你好可憐,亦都更加覺得我爸爸比你更加可憐,所以我想令你開心。可能只係我想代你老婆令你開心,補償我媽媽無陪我爸爸呢種罪惡感。


 
 但你一次又一次咁拒絕我,我就更加發現其實你真係好好,好愛鍚你家人。前幾日,我媽媽收到一個親戚通知,爸爸喺外國中咗風。我媽媽聽到之後,就立即撘飛

機過去搵我爸爸,我先發現,原來媽媽對爸爸仍然存在感情。而尋日媽媽打俾我,希望我都可以飛去加拿大陪佢地兩老一齊過日子,所以我決定,跟佢地一齊過去。


 
 你已經比我爸爸媽媽幸運,佢地喺咁多年之後,先發現大家錯失好多時間。我覺得你老婆同我媽媽一樣,仍然係好愛佢自己老公。所以,小藍最後對費哥最後一個
願望,係希望費哥可以好好修補同老婆既關係。聖誔節送份聖誔禮物比佢,同佢一齊食聖誔大餐,陪D仔囡一齊玩,多D對佢地笑,再請佢地食一粒藍食既
M&M,一定可以架!

  最後,我好辛苦咁先揀到全樽係藍色既M&M比你,希望你以後唔開心時就食一粒,諗住小藍幫你打氣。更加希望費哥你以後每次見到藍色,就會諗起小藍。



  雖然我仲有幾句想同費哥你講,不過張紙寫到底LU~我都會永遠記得你的!

  祝費哥永遠幸褔快樂!
  祝小藍永遠美麗動人!

                       FROM 永遠可愛的小藍

我睇完呢封信,我不禁流下眼淚。多謝你,小藍。

我打個電話比老婆,同佢講我今日又唔記得帶鎖匙,叫佢等埋我先好訓。

放工時候,我去買咗部新既手提電話,一套迪士尼英語動畫套裝同一個毛公仔諗住分別送俾我老婆仔囡。

回到家中,已經十一點幾。我自己用鎖匙開門,見到老婆仔囡三個已經喺張梳化度訓著咗。我輕輕的過去吻我老婆,喺佢想鬧我之前,我用喺小藍臉上學番黎既笑容對住佢,再拎份禮物俾佢地。

老婆責罵我做乜亂洗錢,但我依然對住佢笑。佢又話我做乜喺度傻笑,做乜有帶鎖匙又話無帶搞到佢地無得訓。我無理,我繼續對住佢露出小藍既招牌笑容,同佢講一句,聖誔快樂。

老婆都俾我感染到,開始笑。之後就話,佢同仔囡都累,要入去訓喇,叫我都早D訓,聽朝要番工。

見到老婆笑,我突然間感到,原來係我自己都好耐無對佢笑。我要學小藍,無論咩情況都要笑,去感染老婆,令佢都感到開心。

我入廁所沖涼,聽到房既關門聲。之後我老婆入咗黎廁所,同我講:「見你今日咁好死送禮物比我,我都送番份聖誔禮物俾你啦!」

當晚,我的小費進入了久違了的洞穴。

之後我們約定,每年的聖誕節、年初一、清明節、復活節、端午中秋重陽,如果她有心情的話也可以送禮物給我。








當我期待著年初一既時候,我老婆話我知,佢又有咗了。

看來,我一生人要努力工作,為老婆仔囡做牛做馬,就係我呢一生既命運。

但我決定要笑著面對,像小藍一樣,用笑去感染自己同身邊既人。

「記得洗埋D奶樽先好訓呀!」
「得喇,一陣洗啦!岩岩放工番黎好累呀!」
「做嗰時唔見你話累?三個細路你有份架!」


    -- <<灰加藍>> 全文完 --


後記:
好多人想問,究竟呢個係咪真人真事,係咪真係有廢哥。
事實上,呢個係一個故事,但同時,我身邊真係有一位廢哥。

寫呢個故事既原因,主要有兩點。

1)係平時聽廢哥講佢好多唔開心既事,我戲言話叫佢搞掂身邊D女同事,就開始創作呢篇小說,希望令佢開心。
2)今個月尾係我三十歲生日,我中學時期好鐘意寫小說,喺廿九歲既時候,我為自己許下一個生日願望,係我三十歲前,可以再寫多一篇小說,作為我自己既生日禮物。

初初既時候,我只係比廢哥同埋同我一D認識廢哥既朋友睇。而創作主要係希望同故事主題一樣,灰加藍(甜)各佔一半,一半講灰的事,另一半為廢哥加甜。慢慢地,幾位長工時既朋友,睇完之後覺得身同感受,而結咗婚甚至未結婚既,亦都開始擔心會唔會自己有朝一日變為廢哥。

好多人一路睇,一路都認為我寫得好似劇集,而事實上,我一路寫時,係代入咗廢哥,幻想每日長工時工作,放工後連見老婆仔囡既機會都無,放假時一個人去街,我真係好感受到嗰種悲傷既感覺。

朋友建議我放上高登,認為會得到好多人共鳴,所以我決定用廢哥身份,去高登開始貼文。

放上高登後,比我預期中更加多人睇,更加多正評,更加多回覆,係我自己始料不及。

我每日都有睇大家既回覆,但係有D問廢哥既問題,我真係叫我自己身邊既廢哥去嘗試解答。

故事原來設定有兩個結局,一係同小藍一齊,但最後小藍都變為老婆一樣咁惡,令廢哥其實無論點揀都係無分別;二係佢最終都係拒絕小藍,番老婆身邊,無論做牛做馬,都想養老婆養大仔女,做一個好男人。

我相信,大部份男人,都係後者。

一路寫落黎,我開始對我自己既未來有擔心,我自己都好怕將來會變成廢哥。我甚至叫我未來老婆睇我呢篇文,希望提醒佢將來唔好變成咁樣。

我想將呢篇文,送俾所有已經結婚既,或者即將結婚既女人。我希望佢地明白,生小朋友後,將所有感情放落小朋友,對小朋友太照顧,會好容易冷落老公。其實大部份男人,並唔想出軌,其實男人們都只係小朋友,希望有人鍚,有人照顧。

我更加想將呢篇文送比廢哥,或者即將變為廢哥既男人們。我自己都好明白男人番工既辛苦同壓力,但我自己寫完呢篇文之後,就更加驚覺到,淨係搵錢係未必足夠。當老婆對你發惡既時候,你依然要笑,用笑去感染佢。

我自己亦都即將結婚,我希望幾年後,我唔需要用自己身份寫一篇續集。

希望大家生命中,無論係老婆定係老公,都本住小藍既快樂精神,可以永遠令自己同身邊既人快樂。


全文打包將會喺我自己Blog 度
http://blog.yahoo.com/dreamsdream/articles/741351/index
而如果大家喜歡,亦可以喺FaceBook 度,繼續留意我既更新
https://www.facebook.com/SiuDream

如果想睇未刪改版原文, 請到高登討論區
Post 1: http://forum4.hkgolden.com/view.aspx?message=4013747
Post 2: http://forum3.hkgolden.com/view.aspx?message=4020514


再一次,多謝大家對小夢同廢哥既支持。多謝你地陪伴我呢一個星期。後會有期。

喜歡的,歡迎轉載。

2012年7月16日 星期一

0 [小夢散文] YMCA 城景閣



想一想,自己已經幾個月沒有寫食評,當我正常下筆(下鍵盤?)時,發覺千篇一律的食評,不要說看的悶,寫的我似乎更悶。想看食的話,上OpenRice 可以看的就更多更Pro,而且我Blog 中寫食評的觀看率是最低,花的時間反而最多。所以我想來想去,我也想不出為什麼我要繼續寫食評了。

然而,在我沒寫食評的幾個月間,似乎連自己也忘記了最近吃了什麼。就如我上篇<回憶>提過一樣,我的記性可能真的是越來越差,如果連少少的評語也不寫 下,如果連相也不影一張的話,原來我真的會忘記我曾經去過吃過一餐。當然,一日三餐每天也吃,忘記了又不代表沒有吃過,但有些時候吃了的一餐總想令自己記 下來,寫食評的時候往往可以在視覺和感覺上再回味一下當餐的感覺。

2012年7月10日 星期二

0 [小夢散文] 回憶

回憶真的是非常奇怪的東西,有時候,某些事你以為永遠都不會忘記,但偏偏想記起時,怎樣也再記不起。
我沒有寫日記的習慣,特別是快樂的時候,我從來沒有寫過日記。




我一直地認為,快樂的事情,我是不會忘記的。
跟她跟他跟它的快樂回憶,我應該一世會記住。

原來到最後,記得的,只剩餘一個目錄。

2012年4月18日 星期三

17 我的十年工作生涯(三)

上回寫到我收到政府寄來的大信封,就立即回家拆開,這份當然是Appoinment Letter 了
!亦即是說我將會加入政府,成為十八萬公務員的其中一員!基本上一大堆文件全部都是Terms & Condition 等,到現在我也沒有認真的看過。而其中一頁是可以揀選Report Duty 的時間,經我研究後,發覺揀在15號前會早跳Point (例如3月16至4月15入職,跳Point 一樣是4月;而3月15日前入職,跳Point 就在3月)。
我當然是選擇了最早最早的日子,不過最後的結果,還是被安排在3月尾才入職。




2012年4月12日 星期四

3 我的十年工作生涯(二)

上回寫到做完電腦試之後,我就如常上班工作;好了,我想大部份正在看這篇文章的人,其實最關心的只是我如何考上公務員,但實際上原本這篇文章是想寫寫自己十年來的工作生涯 ;可惜,一來有些事情隔得太久沒法記起,二來又發覺根本上大多數人工作也是這樣子,似乎又沒有什麼可以寫,既然如此,就先談談成為公務員的經過吧!

時間有點記得不清楚,有一日收到信叫我去做面試,面試的地點是雪廠街政府合署。其實由電腦測試到去面試,前後時間也大概只是一個月左右,比我想像之中快得多了。於是我即刻到Discuss.com 看一看有沒有網友和我一樣收到面試信,不過我發覺收到的人似乎不多,就算收到,面試日期也在我之後,亦即是那時的我並沒有什麼資料可以參考得到,並完全不知道究竟面試會問什麼,要做什麼。



以往我見工,我一定會閱讀關於那間公司的一切,包括行業和公司背景等等。我常常教某些朋友見工,總之無論那份工是如何,你也要感到那份工有萬分的興趣,目標只有一個,就是要那公司請你!例如公司是賣廢紙的,你要說你知道環保是大勢所趨,所以你對這公司業務和發展相當有興趣和信心云云。細公司要說喜歡自己一腳踢可以接觸多些,大公司要說喜歡有制度等等等等。

15 我的十年工作生涯(一)

一路以來,都想以我工作的生涯寫一篇文章。由中七畢業以來,至真正開始打工至今,也有十年了。認識我的朋友都知道,三年前我考上公務員職位,亦是一個最低級的助理文書主任。

很多朋友知道後,也覺得驚奇,甚至到呢一刻也來問我有沒有後悔!一來原因是人工實在低(各位網友要知道我人工,其實並唔難,公務員人工是非常公開的)!對啊,我畢業後第一份工的人工,比起我進來政府時,還要高,而且當年是有金融風暴、SARS等等因素下的經濟環境!之後大家當然也知道,03年後經濟不斷向上,我亦都由一個初畢業的小子慢慢成熟成長,轉幾次工後,薪金亦都水漲船高。

到08年就再發生另一次金融海嘯,那時我又剛剛轉工去到一間上市公司工作,剛進去時公司訂單多到接不完,可惜環境突然急轉直下,新買的廠房也要停工,當時我也心感不妙,最終,新來新豬肉的我也逃不過被LayOff的命運!當然,就算被LayOff,也要留多幾日處理客戶和廠之間的工作;在這幾天的空閒時間,當然是要努力搵工,而亦剛巧政府重新招聘助理文書主任,經過在網上填那份要填超過半小時的GF340 後,便申請了我第一份,亦是唯一一份的政府工了!



2012年3月1日 星期四

0 [小夢散文] 談談情人節送花

每一年總有好多節日係是一年一次(其實這句OPENING EXACTLY 係廢話之中的廢話,除了二月廿九日跟世界盃和奧運一樣是四年一次之外,基本上天天也是一年一次的。),商人們總一早想盡方法去利用這種節日去賺你們的一分一毫,其中一個節日就是情人節了。

經 常有人說,最容易賺的錢是女人和小孩子的錢。的確,要男人在銀包中掏出銀紙來買些不實際的東西,就只有他身邊的女人或仔女才做得到,試問一個正常男人怎會 無端白事去買札花?說實在你免費送札花給我要我拿回家我也覺得麻煩,不過女人嘛,就是總虛榮心重的動物。所以,花,並不是要來觀賞,更加不是要來插在花樽 的,最主要加唯一的用途,就是要來「哂」的。

一 札花,在平常的日子,只是幾十蚊,偏偏到情人節時,就升價十倍了!原因也就是當天是最值「哂」的一天!有老公有男朋友的,就算平時有幾幸褔每個月俾十萬九 千七家用,每晚煮燭光晚餐給她吃也好,也總不能和全公司人說:「你知唔知我老公平時對我點點點?你無?唔係嘛?」就算真的有人厚面皮說出口,也應該只是犯 眾憎的一個,而不會令人妒嫉羨慕!

所以,送花一定要送去公司,要越早送越好,最好就是令你的她第一個在公司收到花,令到那札花由朝早九點 半一直放到放工為止,保證全公司人都見到,那樣的「收視率」才可以值會那花在那天的附加價值啊!除非本身因她工作關係而不可以送到公司,否則不要想到放工 才拿著札花給她!街上的人全部不認識她,而且出到街中每對情況也大多有花在手,一點也不矜貴啊!

2012年2月27日 星期一

0 [小夢散文] 婚價


婚禮,是一對情侶由男女朋友進化為夫妻的一個過程;這集星期二檔案所說的,如題目所說,就是「婚」和「價」
香港人受中國傳統思想所影響,有三書六禮、有婚宴;卻又同時有著西方的婚照、渡蜜月等等。一切一切,都和錢有關係!
好多人都認同的一句,就是婚姻只是兩個人的事,但事實上可以做到的人又有幾多?
只因一句一生人一次,於是要和家人親戚交代;
亦因為一生人一次,所以要和朋友比較。
誰的婚禮更豪華,你們的是原隻鮑魚,那一對卻只是鮑魚菇。

2012年1月23日 星期一

0 [小夢散文] 關你Q 事


聽日就係大年初三赤口,我首先教識大家兩句應付鬧交嘅方法,等大家赤口可以平平安安,唔使同人唇槍舌劍展開罵戰!

細個既時候,曾經有幾個月,我問我位Best Friend一條問題(恕我已經唔記得係咩問題),佢竟然答我一句「關你Q事呀?」結果之後的三幾個月,我同佢亦只係用呢句說話黎答對方所有問題。而呢句說話亦都正好好可以停止對方再追問,亦都可以停止所有對答,實在不失係應付人問題的一個好答案!

我偶像黃子華講過,用「搵食啫,犯法呀?」呢兩句世紀金句可以解決呢個世界上好多嘅問題,不過我發覺呢兩句係唔可能包含所有對答,例如佢由最普通的無 聊題問你今日你去邊食冕,到問你覺得前面著黑絲條女索唔索,或者深奧啲想問你對溫室效應對90後有咩心理上嘅影響呢類問題,係絕對唔可以用搵食啫同犯法呀 去解答人地。

2012年1月3日 星期二

0 [小夢散文] 他不准我哭

你上一次哭時,是什麼時候?

哭,是由一出世便懂得的本能,從媽媽體內出來這個世界,在懂得呼吸的同一秒鐘,我們便懂得哭了。嬰兒時,肚餓 的時候哭,賴屎賴尿又哭,想人抱想訓覺亦哭。大了一點,哭的理由變為默書不合格、被隔離位技安蝦、阿媽唔肯買玩具、比同學改花名等等。。。無聊嗎?對,真 的很無聊,我想,看得篇文章的,已經沒有可能再為以上的事情而哭。

肚餓,我們寧願人吃人,也不會流出一滴眼淚,因為長大了的你知道,就算 哭得再大聲,也不會有人來餵你吃,叫會叫你SHUT UP;不幸賴屎又好奶屎又好,IS YOUR OWN SHIT,無人會幫你善後;OT到深夜想訓覺,你只可以咬緊牙關努力完成工作;被隔離位技安再蝦你,你點喊都唔會有叮噹出現拿出發寶幫你教訓佢;阿媽唔肯 買樓俾你又好你自己買唔起樓又好,喊到眼淚變做血,特首亦都只會每年起二三千個居屋,地產霸權亦依然存在。






2012年1月2日 星期一

0 [小夢散文] 頒獎禮

每年年頭,又是樂壇一年一度的頒獎禮,有人覺得,歌手上台喊虎喊忽都唔知真感動還是假演技;不過,我每次看到頒獎禮都好感動,每次皆會令我自己回億出經過一番努力後踏上舞台,一個人在射燈下對著黑麻麻的人頭,眼中只望到那發光的EXIT牌那種感覺。

森美話上年唔係2011年,係那些年;
年輕時,我參加過很多比賽,有小時候的講故事比賽,到長大後的音樂比賽,到最後的YES選舉。
宣佈拿獎前的緊張心情,到宣怖後企上台的感覺,其實很夢幻。
當年上到台,我已經不記得自己說了什麼了,甚至我講完之後,司儀問我問題我竟然都完全聽唔到。
其實我應該有好多野想講,我應該更加多用時間好好表達自己。。。。應該。。。。應該。。。。

足足十年有多了,我相信自己再也沒有什麼機會,可以對住下面幾千人說得獎感受,以後的,只有自己頒獎給自已。

2011年我對自己沒有什麼值得獎勵的,投資的成績亦都不甚理想,唯一可幸的,係自己重拾寫作的樂趣。
想當年年輕時設了一個網站,偶然分享一下自己的寫作、音樂,每天有一百幾十人來看看,其實也都很滿足快樂。
如果說2012我想做的,是希望可以多寫一下散文,有時間的話亦都想寫一篇小說。
希望讓我這個小小的網誌記錄一下自己的文字,希望2012完結時,讓文字可再次為我頒一個獎給自己。

再站上頒獎台上接受眾人的掌聲縱使不再可能,但求有天我會再次為自己的成就而鼓掌。

2011年11月23日 星期三

0 [小夢散文] 遺憾

有一種感覺,叫遺憾。
每個人,也會經歷無數的遺憾。
要做到人生無悔無憾,是妄想。

遺憾是一種藏於心底深處的感覺,是後悔的進化;十年前你後悔自己為什麼不向她表白,錯過了發展的機會;今天,你會覺得當年沒有表白,未有發展,是遺憾。
或者有人覺得,應該盡量盡力做到沒有遺憾,才算不枉此生;但有時我覺得,有遺憾的人生,才是圓滿的結局。

就拿足球小將作比喻,我們也曾經喜歡過衝力射球、猛虎射球、人海戰術。誰會不記得屑牙的兩兄弟?到今天,足球小將完不了,戴志偉領導日本打世界盃,WTF?下一步要打上太空,和外星人對戰?

另一套相似題材「男兒當入樽」, 到現在還會令人感動,是因為它完了,在大家覺得應該繼續的時候完了!我們不知道流川楓在NBA打成怎樣,不知道櫻木以後還會不會打籃球,我們很想知道,很 想作者畫下去;但我更加知道,如果他再畫下去,無論是怎樣的結局,也一定不會可以滿足所有人,留下一個遺憾,反而更令人覺得是完美,就是種缺憾美。

如果當年踢完到小學決賽,戴志偉受傷了,那場波他輸了,他以為自己永遠不能再踢波,他哭了~~那樣的話,大家的印象是否會更深刻?

九把刀告訴我們,所遺下的遺憾,全都可以在平行時空中從新選擇;但其實,有遺憾何嘗才不是一個完美的人生?

雖 然我只是過了短短的廿多年,的確我覺得自己有很多值得遺憾的事,我時常在想,如果當初是XXX,那麼現在就可以YYY;但再想深一層,如果不是留有這一點 點的遺憾,每一步都是HAPPY ENDING 的話,人生就不會經歷那麼多,不會成長得那麼快;我不希望我會忘記任何遺憾,就讓我將所有放在我心底的深 處,直至我雙眼永遠閉上為止。

0 [小夢散文] 小夢2004 年散文集

最近在整理自己從前寫過的一切,終於搵番舊硬盤內的散文,這一批全部都是在2004年所寫的;雖然再看一次覺得有點搞笑,不過現在寫的,過兩個月睇又何嘗不是一個笑話?就原汁原味整篇移到這裡,看一看7年前的我有多搞笑?!

《戀情告急》 (16/4/04)
「感情會結束,經歷會留低,陪我繼續戀愛!」看罷<戀情告急>這句對白一直在我腦海中不斷重覆。的確在每段感情結束,無論是否深愛過,無論有沒有深刻的經歷,無論什麼原因分手,無論長與短,總會或多或會影響以後的戀愛:
「原來我鐘意食什扒,係我第一個女朋友教我。」
「原來我同你o係樓梯kiss,係我第二個女朋友教我。」
原來一切一切也是在循環,從前的不懂得在樓梯接吻,當A小姐和你在樓梯接吻後你懂得這一套,下次這一套將會用在B小姐身上,B小姐又和C先生,C先生又和D小姐,後來可能D小姐又和你...

2011年11月20日 星期日

0 [小夢散文] ICQ - 我們80後的回億

最近,那些年令我們回億起當年在年輕時追不到女孩子的那種回億。
的確,從前我喜歡過的女孩子,差不多也成了人妻;和九把刀一樣,聽到的盡是那些人妻們要結婚的消息。

除了那種年輕時的感情事外,我在想,我的回億還有什麼?



是那些動畫:男兒當入樽、亂馬1/2、美少女戰士、四驅小子、龍珠!
對。。因為龍珠,我曾為了尋找回億,個多月來沉迷在打龍珠ONLINE,由台服打到港服;由孫悟空用到迪子魔童!
最後,等級升盡了,回億也完了,遊戲就此放下了。

2011年11月18日 星期五

0 [小夢散文] 結婚的意義

你是否願意嫁某某作你的妻子,並承諾從今以後,無論環境順逆,疾病健康,富貴貧窮,你永遠愛慕佢、尊重佢,終身不渝?

這種對白,由小至大都已經從電視中聽到不知多少次,只是又有幾多人明白到結婚的意義?

聽聞一個舊同事離了婚,當年我是有份去飲喜酒的,當然覺得有點可惜。




有些小朋友,因孕成婚,是因為有了BB而結婚,最後因了解而分開,當然不能長久;這樣的事情是可以理解的,因為大家都從來都未清楚了解對方,從來沒有想過將來應該是怎樣,沒有計劃,失敗應該是意料之內。

2011年11月17日 星期四

0 [小夢散文] 妄想、夢想、理想

不知為何小時候,大約在幼稚園到初小學左右吧,寫出來也好、畫出來也好、在堂上發問也好,總會有類似「我的志願」般的題目。

老實說我已經 不記得我在小時候答老師時我的志願是什麼,只記得當我還是小學生時,每逢週末爸爸媽媽總喜歡由觀塘的家中到荃灣的同事那邊攻打四方城;而每次打到深宵後就 會撘的士回家,從那時候開始,我的第一志願就是要當個的士司機!只需半小時便可以賺取近一百大元,而且還可以駕著車周圍去,何樂而不為?

當然,過了幾年後,我便知道這只是個白痴的想法。

要 說到最白痴的「我的志願」,可以說是一位我曾經喜歡的女孩子(當然如今已經是中女有餘了吧),她告訴我,當年老師問要大家寫出自已最喜歡是做什麼,當然同 學們也是答那些什麼什麼師,不過她卻答了一個答案,是「企鵝」。沒錯,她希望做企鵝~我問她原因,她說她自已也不記得了;而我認為,應該是從前可口可樂廣 告中那一隻可以天天飲可樂的企鵝,要不然,幹嗎要當企鵝?


要當一隻企鵝,自然是妄想,因為當企鵝是一件接近不可能的事!(在我角度,沒有一件未發生的事是絕對無可能的,只是機會大與小」
但究竟從前的「我的志願」,要問的是理想,還是夢想?

中學開始,「我的志願」由「渣的士」變為做「ARTIST」。對,我想做的,只是一個「藝員」而非一個「明星」,好多人的夢想是「做明星」,而我沒有這般的大志,我只是想在TVB做一個普通的藝員,一個大配角,天天可以在演戲就足夠了。
從那時開始,我準備好自已的口才,演技,希望有一天能有星探看中我;當然是,直至到我中七那年仍然沒有人看上我,結果我去參加了某雜誌舉辦的比賽,成功贏取了一份經理人的合約,可以在雜誌上拍硬照、拍廣告,還有機會去電影的試鏡。

說到試鏡,那年我上了一個商業中心,試一套我也不記得是什麼的戲了;那個好樣是副導演的人叫我們一班人一起在做戲說對白,然後用DV拍下,一星期之後,我收到他的電話,說導演看過我後非常滿意,希望我演一個14歲的角式,是張學友的兒子,明天早上立刻來見導演,她想見我。

那個導演,就是許鞍華。

我一早就上到那商業大廈,那副導演安排了我坐在一間類似會客室的房內。等呀等,等了大半個鐘還未有人來接見我,接著,我看到那老女人許鞍華手渣一口煙,在問口上那個圓型的玻璃窗看了我一眼;對!只是一眼!

再過數分鐘,那副導開門入來,叫我可以走了,有消息會再通知我!

我真的不知道發生什麼事,而我亦乖乖的走了;最後我知道,當年有份和我一起試鏡的人,全部最少有得做「騎呢啡」(或稱臨記、跑龍套),而我一直沒有消息。到現在我也很想知道是為什麼。

之後我還有參加過大大小小的試鏡會,還有考過TVB的藝員訓練班。到最後經理人合約也完了,我的「藝員夢」也正式的結束。

你問我,覺得當年是理想還是夢想,我會答你我覺得是理想;我有步驟一步一步實行,但最終失敗了。在這個香港,在這個世界,不成功就是不成功,那麼我認,那是「夢想」,是發明星夢。

再之後的幾年,我開始努力搵錢,更開始炒股票;一年贏十倍並不是夢想,而是目標,我成功過失敗過跌倒過再爬起過(這些故事,有機會再談),我又發覺炒股票發達,似乎又是夢想多於理想。

最終發現,其實理想和夢想甚至是妄想,其實都只是自已人生的目標,分別在於實行的可能性,而理想就是極之有可能。

那麼我的理想就只剩下最簡單的東西:有錢時可以再去多幾次日本旅行、買到一層不用在大西北的樓、有能力每日打好篇BLOG、生活得開開心心、自已和身邊的所有人都身體健康、一切順順利利。

希望以上的真的是理想,不如變成夢想或妄想。
 

小夢生活 - Dreams Life Copyright © 2011 - |- Template created by O Pregador - |- Powered by Blogger Templates