0 [小夢散文] 關你Q 事

聽日就係大年初三赤口，我首先教識大家兩句應付鬧交嘅方法，等大家赤口可以平平安安，唔使同人唇槍舌劍展開罵戰！

細個既時候，曾經有幾個月，我問我位Best Friend一條問題（恕我已經唔記得係咩問題），佢竟然答我一句「關你Ｑ事呀？」結果之後的三幾個月，我同佢亦只係用呢句說話黎答對方所有問題。而呢句說話亦都正好好可以停止對方再追問，亦都可以停止所有對答，實在不失係應付人問題的一個好答案！

我偶像黃子華講過，用「搵食啫，犯法呀？」呢兩句世紀金句可以解決呢個世界上好多嘅問題，不過我發覺呢兩句係唔可能包含所有對答，例如佢由最普通的無 聊題問你今日你去邊食冕，到問你覺得前面著黑絲條女索唔索，或者深奧啲想問你對溫室效應對９０後有咩心理上嘅影響呢類問題，係絕對唔可以用搵食啫同犯法呀 去解答人地。

呢個時候，就正正係要用到我位老死所教的「關你Ｑ事呀？」做回應喇；我相信世界上有百份之八十嘅問題，都可以用呢五個字去應對。

當然，Ｑ字可以因應唔同程度而使用咩撚閪柒尻等作為配撘用唔同程度去配撘，唔好以為配撘係一條簡單嘅事，其實都係一種學問，如果配撘不宜，其實會令人有反撃嘅機會，或者令人有所誤會。以下我舉幾個例子：

假設你係唐英年，有個記者黎問你，你幾時公開你個私生子呀？如果用「關你咩事呀？」黎回應，佢會真係以為你問佢關佢咩事，咁佢可能真係會認真答你因為 佢要交稿俾老闆，或者要交代俾公眾聽，呢個時候，如果你係用「關你撚事呀？」黎答呢條問題，對方一定會最少有半秒發呆時間，呢個時候你就可以襯機揮袖離 去，一來唔使諗借口點答，二來又不失霸氣，我絕對諗唔到一句可以俾我呢句更加有說服力。

我頭先都講過只係有百份之八十嘅問題可以用「關你Ｑ事呀？」黎應對，而仲有百份之二十，亦都只係簡單的改一個字，就係「關我Ｑ事呀？」無錯，當你雅蘭門口煲住煙等你女友喺旺角站出黎時，仲會有條女搭你膊頭，問你想唔想做GYM或者有無一分鐘時間幫佢做份簡單嘅問卷嘅時候，你可以簡單答一句「關你Ｑ事呀？」就打發佢走；當然我認同依啲「企街」係十分難應付，你答完呢句後佢亦都會繼續問你下個問題或者繼續講佢要講嘅野，當佢繼續講佢依家JOIN一年會員只係＄８８８８任做，或者叫你幫幫手佢好慘企咗成日都未問到一個只係阻你半分鐘，你亦都可以吹出你啖煙，答一句「關我撚事呀？」

要再舉例實在太容易，但我呢兩句實在係小學雞都識得用，如果你睇完呢篇文都仲係諗唔通應該點用的話，歡迎留言、EMAIL或者打電話問我，不過我嘅答案，其實已經好明顯啦！