2 《我的悲慘媾女史》第一集

星爺喺少林足球入面講過，一個人無夢想，同一條咸魚無分別。



計我話，一個人無番條女，比起無夢想，更加似條咸魚；應該係，比咸魚更加無價值嘅死魚、臭魚、爛魚。

或者可以講，我人生到呢刻為止唯一嘅夢想，就係媾番條女；

成廿八吋大脾又好、３０ＡＡ又好、暴龍爛面又好，通通都媾唔到！

點解點解，我永遠都係失敗嘅一個，一條無女嘅可憐蟲。



或者你會恥笑我，又或者你會身同感受，更加可能你睇完只會覺得我ＯＮ９。無論如何點都好，你入得黎睇，我就當你老友，我希邊喺呢個寂寞嘅夜晚，用你少少時間，睇下我呢個可憐蟲媾女失敗嘅經歷。



除咗我無記憶嘅三年幼稚園外，由小一到中七，我都喺人稱和尚寺嘅男校入面渡過。以前成日睇電影入面，男校男生放學總會三五成群去對面女校等人地Ｄ女放學，之後俾人地校長訓導趕走。但我母校附近方圓幾百里都竟然無一間女校！



以下，係我十幾年來媾唔到女嘅親身經歷。



我唔知係因為我早十幾年前年代唔同，定係因為由於我一直都係讀男校嘅關係，我唔似得依家Ｄ細路，十一二歲唔好話拍拖，甚至都已經識得啪啪啪。

我係家中獨子，亦唔覺自己有相近年紀嘅表姐表妹堂妹等等嘅親戚出現，我最細嘅一個表姐，好似比我媽年紀仲要大。所以，一路以來，我對女性嘅認識近乎零。

所以我依家喺度諗，會唔會係因為咁，一開始已經輸在起跑線上？



升上時候中一嘅我，以今日嘅術語黎講，仍然係小學雞一名。呢間似監獄多於學校嘅中學，面積就只係一個四層高嘅三角型建築物包圍住一個籃球場咁大。而當中卻收容了上千個學生。每逢小息、ＬＵＮＣＨ時，踢波嘅踢波（幸好只係踢西瓜波，如果係踢皮波，應該日日要叫白車），打籃球嘅打打籃球，亦有人周圍跑，玩捉Ｅ因，玩互閹等等。我亦都無乜朋友，渾渾噩噩咁就過咗一年。

 

我開始對女性有興趣，開始想媾女嘅時期，應該比起一般人遲，大約，係中二嘅時候。



可能我天生比較遲熟，甚至乎依家三十歲人，亦都係廿二三歲咁，睇番自己Ｄ相，當年中二嘅時候，亦都只係似一個八九歲嘅小學生。

我第一個鐘意嘅女人，係我當年嘅ＩＳ（綜合科學）ＭＩＳＳ。 到呢刻，我仍然深深咁記得佢個名，不過當然我唔能夠喺呢度打佢個名出黎，唯有用住代號，叫佢ＭＩＳＳ　Ｘ。

 

我嘅媾女史，就係由ＭＩＳＳ　Ｘ開始。

 

升上中二嘅第一日，我嘅班主任係一個光頭阿叔，講野溜口之餘仲會經過佢唔齊嘅門牙噴出口水，令婑細要坐喺第一行嘅我身受其害。當年未識講粗口嘅我，只係心入面諗一句，唉，今年真係唔好彩，唔知要受幾耐。喺捱呢４０分鐘口水時候嘅我，絕對想不到，接下落黎嘅第二堂，會係改變我一生嘅時刻。