原文轉貼自高登討論區,
作者: Mr. Pizza (如作者不同意轉貼, 請告之刪除)
http://forum3.hkgolden.com/view.aspx?message=3553361
連續兩天，連續給兩條屍體毀去了兩家茶餐廳，這一刻，我們大伙兒已經再沒其他據點了。
不過，我相信這也沒差——
既然阿信說他已經找到方法離開，而重點就在於大帽山； 那，最簡單直接的解決方案，就是大伙兒立即起程去大帽山，逃離這個不屬於我們的世界。
可那到底是個什麼方法，我也因為接聽了阿怡的電話，到現在這一刻的還沒聽阿信解釋。
｢——其實唔算係一個方法；而係，我覺得，我地將會係大帽山上面搵到啲野，可以令我地搞清成件事既來龍去脈。｣ 當步出茶餐廳時，走在我旁邊的阿信跟我講。
｢點解你會有呢個諗法? 大帽山呢個idea，係點樣得番黎?——｣ 我安靜問道。
說時我拿出了手機，察看現在時間: ｢15:22｣
此時，大伙兒都已經走出了茶餐廳，眾集在外面空無一人的寶鄉道上，站在位於｢大埔鄉事委員會｣對出的一個紅綠燈安全島上，圍成一圈。
寶鄉道中還是一片寧靜，猶如鬼城，沒有半點人聲與車聲；剛剛走出室外，我發覺空氣中突然多了某種濕潤的感覺，抬頭一看，遠方天邊好像積聚了些厚重的雲層，似是快要降雨般。
阿信沉默著，思索了一會，然後深深吸了口氣，看著我道:
｢首先，我要講一講我對成件事既睇法——｣
我看著他，微微點頭，示意他繼續說下去——
｢成 件事好人工化——真係好人工化——我可以肯定，絕對唔會係任何一種既自然現在而做成既——成件事背後——一定有某種人為操作； 呢點，我係可以肯定既———試問，又點會有任何一種既自然現象，可以合理地解釋哂一路發生既所有野?! 到現時為止，最大既迷團，對我黎講，就係呢個究竟係一個咩地方——｣
他說至此時，我不禁打斷問道:
｢—— 言下之意，即係你完全排除左我地仲係原來果個世界入面既可能性? 你覺得，消失既並唔係其他所有人，而係我地? 你係咪即係講緊，我地宜家存在緊既，係一個異空間黎? 就好似阿怡比我既果個電話——即係我女朋友——佢講話我已經消失左成6年——6年係點樣得出黎?——｣
阿信聽了我連串疑問，微微點了下頭，托了下眼鏡，遂步分析:
｢首先，係呢一刻，我地所知既資料少之又少——老實講，如果唔係你地話比我聽，原來有防毒面具人呢回事，我地四個係中大，根本唔知呢幫神秘人既存在——不過，除此之外，我地都發現左一樣好有趣既野，証明到，我地所在既香港，並唔係原本既果個香港 —｣
說罷，阿信舉出右手，向上指了一指，道: ｢就係呢樣野——｣
大伙兒立即抬頭，隨著他所指的方向往上看去 —— 只見是根高高瘦瘦的銀色燈柱——
——兩塊燈罩中間，｢T｣字位的頂端位置上，有點銀銀白白的反光圓形東西。
我嘴角微微上揚，笑了下。
原來，阿信也留意到這點——聰明。
｢——其實係peter發現先既；我地係中大果時就留意到，點解毎一枝燈柱上面，都有舊咁既野——｣ 阿信如是說。
｢——唔通係閉路電視?!｣ 身旁的中年男人，側著頭的仰望著。
｢係囉!——個樣點解咁撚似閉路電視既?!—｣ 另一邊的小巴司機也說。
我看著這兩個不知所謂的人，並向他們投以種不友善，不屑的目光——
阿信繼續道:
｢——無錯，我地開頭都係咁諗，覺得會唔會係閉路電視——不過，當我地再睇真啲果時，就覺得佢唔係一個閉路電視咁簡單———｣
未等阿信說罷，大伙兒已經紛紛湧至燈柱底下，左顧右盼的看著燈柱周圍，研究那銀色的反光東西到底是什麼——
我無暇再理會這群廢物，逕自向阿信說道: ｢———因為見唔到佢有鏡頭——其實燈柱上面既呢樣野，我之前都已經留意到，不過一直都無為意——｣
阿信聽後點點頭，一副｢原來如此｣的臉，道:
｢雖則佢係毎枝燈柱既位置上都有出現，令人好容易就會聯想起係用黎監視人既閉路電視——但問題係，無論我地點睇，都係發現唔到佢有任何鏡頭既存在——｣
｢——可能係種新式設計既閉路電視? 出面全部用啲單面既反光紙掩住，所以先睇唔到佢鏡頭?!——就好似，宜家好興既果種，係天花上面垂落黎既黑色圓波形既球體閉路電視。｣ 我說出今早想到的那可能性。
阿信溫文儒雅的點了點頭，道:
｢當 然係有咁可能，但唔合理——如果係閉路電視，點解要整咁大舊?! 即使係最傳統既閉路電視，體積都一定比佢細——要setup閉路電視，其實插個鏡頭係度就已經okay，呢舊銀色野咁大舊，點睇都唔似係閉路電視——再 者，即使佢係閉路電視，有咩理由會毎枝街柱上面都有?!——如果係要作為監視用途既話，無可能會誇張到要毎一條街柱上面都有——唔make sense，如果佢係誇張到呢個地步，咁個設計者一定唔會只係放呢種閉路電視上面係燈柱上，而係會放係好多好多其他唔同既地方，例如大廈外牆，什至各個唔 同既室內地點——｣
｢——可能有，只係我地未為意到?!｣ 我質疑。
｢無 錯，但即使係咁，都仲係唔make sense——如果佢係其他地方都裝左閉路電視，而我地又見唔到，咁果啲閉路電視既體積，什至外形，都一定會同宜家呢隻既銀色反光shape唔同——可能 係更細，更隱密，所以先令我地反覺唔到佢地既存在———但問題黎喇，既然設計者可以做出種咁隱密既鏡頭，有咩理由，係街燈呢種咁當眼，咁易見既地方上面， 反而會安裝上種咁大個既閉路電視——無論係邊種方向推斷，所得既結果都係唔合理——｣
｢同埋佢究竟要監視邊個?!——我地?!｣ 中年男子突然插嘴問道。
阿信轉頭望向青年，道:
｢—— 如果要監視我地，如果佢既目的真係只係用黎監視我地，我覺得，對方無須要大費周張咁裝咁多個閉路電視——係我地由中大黎到大埔墟呢度，沿路 途中既毎一枝燈柱上面，我地一直都有見到呢隻銀色野——就好似毎一條路既毎一枝燈柱，都有安裝左——我覺得，如果對方真係只為左監視我地咁簡單，大可以用 更多其他更有效既方法，而唔會用一種咁浪費成本，咁傻既方便——所以，無論如何，我比較傾向呢樣野唔係閉路電視，更同監視無關——個人黎講，我覺得佢既外 形好似雷達，兩者支間，可能會有啲咩野關係都未定——｣
｢——有無方法可以搵野扔上去，打佢落黎，睇下乜撚野黎架—｣ 小巴司機插嘴問道。
此時，一直站在旁邊沉默的peter開口說道:
｢其 實，我地四個係中大果時都已經試過去拾啲石仔，諗住扔舊野落黎睇下——但問題係一黎好難扔中——二黎，就係我地真係有幾次扔中過，都對舊野無 咩影響，啲石仔好輕易就比佢彈番落黎——舊野好似好硬淨，比人鑲死在係上面咁，好難話用扔石仔呢啲方法，就可以成功將佢整落黎；不過——｣
說至此時，peter轉身望向阿信，似是想要阿信自己說下去——
阿信托了下眼鏡，開口繼續講下去——
｢其 實，我地係第一晚果時，亦即係搭紅van果晚，落左車無耐就已經發現在燈柱上面既呢樣野——我一直都對呢樣野好在意，覺得佢地既在一定係有某 種意義——直到尋日朝早，日光日白，我地再次研究舊野究竟係咩黎既時候——Jasmine用佢部單反zoom埋燈柱舊野果度，影左張相——然之後——我地 發現左啲野——我save左張圖落 iphone，你地可以睇下。｣
說罷，阿信立即從口袋裡拿出了部手機，用手在屏幕上點了幾下，開啟了點什麼，然後，反轉手機，平放在掌心，伸前給我們觀看——
大伙兒紛紛舉頭向前，看個究竟——
手機上顯示的是張照片——照片似是在某個山邊拍攝，旁邊背景都是些綠色的草坡；從下而上的拍上去，山坡旁邊，是根根高高瘦瘦的銀色燈柱。
｢呢條燈柱係我地係中大入面影既——｣ 阿信一邊解說，一邊用兩只指頭向外拉劃，把照片放大——
驀地，照片給放大了好幾倍；阿信不斷用指頭移動照片焦點，往一個銀白色的反光物體上拉去——
亳無疑問，就是燈柱上面的那個不知明的金屬物體沒錯。
就在此時，放大了好幾陪的圖像，讓我清楚看見，那銀色的金屬物體上，好像有點什麼——
｢——喂喂喂，屌咪郁住先——! 好似…..好似有啲咩野係上面咁既?!｣ 小巴司機疑問。
｢——係喎——又係喎——個銀色野上面——好似——睇下先——舊銀色野個邊邊位果度——好似——好似寫左啲野喎——｣ 中年男子應道。
對，沒錯——
我看著那照片，發覺那銀色的金屬物體的邊緣位置，彷彿有幾只淺幼的黑色字句，寫著什麼——
沿著那圓形物體的外形邊界，字句排列得很工整，似是用電腦字體打印上去；可體積就是太小，看不太清楚——
｢好似係英文——定係數字?!｣ 中年男子疑問。
我定眼一看，發覺那是句由英文及數字一同排列而成的黑色字句——
｢shatin 00141｣
——?!
此時，站在隔壁的中年男子也看到了，大聲叫道: ｢s，h，a，t，i，n，0，1，4，1!! 佢寫住shatin，0141!!———沙田第一百四十一啊!!——｣
我一臉不解的看著阿信，只見他微微點頭，道:
｢無錯，shatin，0141——我地發覺個金屬盒上面，寫住句咁既野——｣
剎那間，我想到了某種可能性——
我立即推開身旁的大伙兒，逕自往旁邊的燈柱跑去——
我駐足在燈柱下，仰頭往上看，嘗試找尋自己腦海在想時東西——
如果在阿信那副圖片裡面的金屬物體寫著了條｢沙田一百四十一｣的編號——那，在這裡的金屬物體，會不會寫著個類似的條碼?!——
我皺著眉，用神的看著頭頂上的金屬物體，沿著它的彎曲邊緣移動看著——
此時，大伙兒似是想到了同樣的懷疑，紛紛跑至我身邊，一起抬頭看著燈柱上的那金屬物體——
終於，我在那圓形的金屬物體邊緣，就像在照片中那條碼出現的同樣位置，看到了條細細的，淺黑色的字句——
｢taipo 00328｣
大埔，三百二十八!!
———該不會是……..
我立即轉身，看著阿信激動的說道:
｢唔….唔通——毎條燈柱上面都有句類似既野——?!!｣
說罷，我正想動身奔向對面馬路的燈柱查看，卻見阿信微微點頭，帶點自信笑容的道:
｢—— 無錯，估得無錯——係毎一條街柱上面既呢啲銀色金屬盒，都有條類似既條碼——我地係中大入面睇到，就係呢條燈柱隔離既其他燈柱，毎條燈柱上 面既銀色金屬盒，都有個一模一樣format既code number——個數字仲要係遞增上去——比如我地影既果條寫住沙田一百四十一，旁邊既果幾條就寫住一百四十二，一百四十三，四十四，四十五——如此類推 ——｣
此時，中年男子已經急不及待的動身向前跑，奔至對面馬路的那條燈柱下面，駐足抬頭觀看——
未幾，傳來了中年男子興奮的叫聲:
｢係啊!!——真係啊!——呢度寫住三百二十六啊!! 三二六!—｣
然後，他又拔足往旁奔去，去到大埔社區中心門外的另一條燈柱旁，抬頭看了一會——
｢三百二十七!!——呢邊寫住三二七啊喂!——｣
我側著頭，快速思索著，嘗試分析這些銀色的金屬盒子上，這一連串的編碼到底代表了些什麼——
此時，站在一旁的小巴司機已經開口說道:
｢———屌，會唔會好似啲燈柱有哂number咁樣，方便啲整燈既人去睇架——｣
聽後阿信點下頭，道:
｢—— 係我地由中大踩車黎大埔既一路上，我地都不斷見到呢種金屬盒，而上面既條碼又不斷遞增緊——直至入左大埔範圍開始，前面既果隻英文字，就由 原本既｢shatin｣，變成大家所見既｢taipo｣；而後面既數字亦改變左，就好似，沙田同大埔既計法，係兩set唔同既野，數字會重新計過咁——｣
我忍不住打斷——
｢大埔——沙田——前面既果個地方英文名，唔通係根據鐵盒所在地既果區黎分——?! 換句話講，唔通香港十八區——毎枝燈柱上面，都有個咁既銀色反光盒?!｣
阿信看著我，一臉認真的回答道:
｢我 地都係咁諗——既然中大屬於沙田區，而個鐵盒又真係mark住沙田——當入到大埔，個鐵盒又變左寫住大埔——按照呢個道理，個編號的而且確係根據鐵盒 既所在地區而訂——所以，好有可能——香港十八區入面，毎枝燈柱都會有個鐵盒，而毎個鐵盒上面都有個類似既編號，同所屬既地區名稱——｣
｢所以有可能，如果係灣仔既果啲鐵盒，就會寫住wanchai?——｣ 我疑問。
阿信點點頭，道:
｢Exactly——絕對有呢個可能——而編號背後既意義，我個人覺得，從最直接既方法推測，正如阿司機先生所講，係比果啲建造呢種鐵盒既人做reference——｣
｢喂，哥哥仔，咪住先———你講黎講去，都仲係未答到，究竟係邊撚個起埋哂啲咁既野係啲燈柱上面，同究竟用黎做咩架喎!——｣ 旁邊的小巴司機急不及待追問。
阿信立即轉身看著小巴司機，尷尬說道:
｢—— 究竟係邊個起呢啲鐵盒裝置，起黎又有咩野用，呢兩個問題固然重要——但係老實講，現階段，係我地掌握既情報係少之又少既情況下，其實好難作 出任何實際推論——我地當然可以作出最直接既推測，例如話呢啲裝置係你地所講既果啲防毒面具人起——或者係用黎作為某種通訊之用——但係無論我地作出邊個 方向既推斷，係無實際証據既大前題底下，尤其是，就連果啲防毒面具人既真正身份係邊個都唔知既時候——我覺得——繼續係呢種鐵盒裝置上面死纏爛打，係無意 義既——｣
聽到阿信說至防毒面具人，我才突然想起，還沒跟大伙兒談及我跟假冒中年男子交手，以及｢胎記男｣出現在我的小學中學照片中的事——不知阿信聽後，會作出何種判斷?!——
不知為何，我突然又再想起死去的眼鏡青年——阿信那種冷靜及理性的分析口吻，教我一直把兩個人重疊著——我忽然想到——如果眼鏡青年還沒死，如果他與阿信二人有機會碰頭——以他們兩個聯手的推斷，會不會已經能夠把事情完整解決!?——
我回過神來，但見阿信已經逕自繼續說了下去:
｢—— 無論鐵盒裝置背後有咩意義，係咩人起——單憑直接邏輯推論，已經可以証明得到，我地呢刻身處既呢個地方，我地宜家見到既呢個｢香港｣，並唔係我地原 來既果個｢香港｣——因為，我敢肯定，係我地架小巴入獅子山隧道之前，係呢件事發生之前，我地毎一位都從來無見過呢種裝置———係咪?!｣
大伙兒紛紛點頭。
阿信繼續道:
｢咁 就可以証明，呢種鐵盒裝置，係事件發生既果一刻，亦即係架小巴出隧道果時先開始出現——問題係，要令全部人同車，都係我地出隧道既果刻而突然 消失，雖然一樣唔可能，但邏輯上，假設對方有某種科技真係可以做到，咁都仲make sense；因為人同車呢兩樣野，始終都係種會流動既野，要郁動佢地既話，始終都仲有辦法——
—— 但係，另一方面，要係我地出隧道果刻，係全港九新界既毎一條燈柱上面都裝上個咁樣既鐵盒裝置——根本係唔可能既一回事——呢樣野同｢人｣、 ｢車｣唔同——｢燈柱｣，｢鐵盒｣呢兩樣野始終係硬件，係一樣唔會隨便消失而再又出現既野——無論成件事背後既始作俑者，佢地既科技水平有幾先進都好，要 係一秒內突然轉變所有既｢燈柱｣構造，呢樣野基本係完全無可能，係唔make sense既 —— 所以，除左我地身處既呢個地方並唔係原來既果個地方呢個解釋之外，我唔覺得有其他任何make sense既解釋——｣
聽至這裡，我微微點了下頭，覺得阿信的分析很有道理。
其實，阿信道出的這點，在我今早跑來茶餐廳的途中也曾想過，可我當時卻沒他所講的推論至這般遠；阿信說得對——其實，單憑｢鐵盒裝置｣的這點，已經足以証明，我們現在所在的這個地方，與我們原本來自的，是兩個不同的領域——
—這裡，不是香港。
——至少，不會是我們熟悉的那個香港。
此時，站在一旁的中年男子開口說道:
｢會唔會——係我地架小巴入隧道既果刻，我地已經穿越左時空，黎左第個空間?! 會唔會呢個係果啲防毒面具人既一個陰謀?!——呢度係佢地複製出黎既另一個香港!?——你頭先咪講咩相對論既!——會唔會——我地超越左光速，去左第個空間啊——｣
阿信看著中年男子，道:
｢剛才所提出既狹義相對論，只不過係我根據呢位先生(指著我)所講既果通電話而得出黎既猜測——如果我地呢個時空，同原來既果個時空，兩者之間真係有時間差別，什至去到成6年時間咁誇張既——我覺得，成件事既背後，好大可能會同呢方面既物理理論有關——｣
中年男子再次打斷，道:
｢——我地會唔會真係穿越左果啲咩時光隨道?—咪住先，果啲咩防毒面具——唔通…就係未來人?! 佢地會唔會就係未來人啊喂?!——｣
阿信思索了一會，繼而搖搖頭，道:
｢——其實無論係邊個角度去睇，我地宜家所經歷既呢一切，已經完完全全否定哂現有物理學既一切認知——
所以，係呢一刻，我真係無辦法確實答到你既問題。不過，正如我岩岩提出，用｢金屬鐵盒｣而推論出既theory，我雖然認為呢一刻身處緊既｢香港｣，並唔係我地原本既果個｢香港｣——
但 係，我始終覺得，我地仍然存在係同原來世界既果個空間入面；因為，如果我地真係處於另一個時空既話，根據傳統物理學黎睇，兩者之間根本唔會有電 波通訊既可能，無可能會打到電話——除去物理學說，即使用常理黎睇，如果我地真係存在係兩個唔同既空間入面，而兩個空間又存在住六年既時間差別既話，一個 快，一個慢，我地又點可能會通到電話，仲要成功交談到?!——｣
聽至這裡，我開始有點按捺不住，覺得阿信講話怎麼會那麼冗長，於是，便開口打斷:
｢咪住先…咪住先!! 阿信——你一直講到宜家，都只係不斷否定緊我地一直所諗既可能性——咁你可唔可以單刀直入咁講下，你自己既諗法係點?! 你之前所講既大帽山，到底係咩一回事?!——｣
阿信聽後看著了我，思索了會，然後低著頭，一邊從口袋裡拿出了自己的手機，一邊道:
｢其實，我一路都唔敢sure自己對於｢大帽山｣既猜測係咪正確，我只係覺得，大帽山呢個地方，一定會係成件事既迷團入面，佔上一個極為重要既位置——直至岩岩聽到你講，你女朋友係電話入面講到關於大帽山既事，我先比較上肯定，認為自己猜測既方向，應該係正確既——｣
只見阿信拿著手機，用指頭在屏幕上面點了幾下，道:
｢其實如果大家有電話，都可以拎出黎，我地一齊做個小小既實驗。｣
聽罷，大伙兒紛紛拿出了自己的手機——
｢大家手機應該都有｢compass｣，｢指南針｣呢個apps，係咪?! 如果有既話，可以開左佢——我地將佢地放埋一齊。｣
說罷，阿信把自己的手機平放在了右手手心上，伸出——
此時，我也拿出了自己的手機，打開了｢compass｣這個app，依樣葫蘆的平放在了手心上，伸出，平排在阿信的手機旁邊——
其他人也紛紛作著同樣的事——
很快，圍成了圈的大伙兒中間，已經聚集了數部手機；屏幕中，全都開啟著｢指南針｣的界面——
只見那由液晶體顯示器虛擬出來的白色圓形｢指南針｣，正歪歪斜斜的旋轉著——隨著大伙兒那能稱之為穩定的手，手機上的｢指南針｣，那枚指著正北邊的紅色指針，正不停地晃動著——
未幾，指針停在了我的正前方方向，示意那邊是｢北｣。
剎那間，看著大伙兒手心中，那一式一樣，指著正前方的紅色指針，我突然覺得有點不妥——
此時，阿信拿著手機，慢慢說道:
｢——呢樣野，其實係我地琴日玩手機時，無意中發現既——想問大家，｢北｣係邊邊?｣
聽到阿信的疑問，看著｢紅色指針｣的我，下意識地想答他｢前面｣——
——因為此刻，那紅色指針，正準確無誤的指著我的直前方…..
可我愣住了——因為我看到前方厚厚雲層中的太陽光線——
現在是下午，太陽怎麼會從那邊照過來?!
——下午太陽理應下山，前面的方向，應該是｢西｣才對啊!!
——｢指南針｣不指向北，指向什麼?!..........
然後，就在此時，阿信開口講道:
｢我 認為我地身處緊既呢個地方，呢個｢香港｣，比一種極強大既能量覆蓋住——呢種力量——好有可能係磁力——唔單止令到我地同出面既時間環境出現差距——更加 令到我地所處既呢個地方，同外界完全失去任何通訊途徑——而呢種能量既發出源頭，佢既中心——就係前面——指南針指住既前面——大埔既正西南方向——亦即 係香港版圖既最中心位置，最高制點——大帽山。｣
0 意見:
張貼留言