仆街，要講真係唔知係邊度講起好…明明出事開始到宜家，三日都未夠，個感覺就已經好似過左三年咁。
以前成日聽人講，｢山中方七日，世上已千年｣，唔知係咪就係呢個意思…
嗄? 唔係啊? 哦…個意思唔同啊? 是鬼旦啦…宜家又唔係寫小說，啲成語執得咁靚都無撚用啦!!
由邊度講起好呢?! 小巴落車開始?
無…果日落車都未有咩發生住，我因為有啲急事，同你地分開之後都好快返左屋企…
首先我要澄清一點，我果日落車時同你地講，我住廣福裡樓上；但其實，我根本唔係住廣福裡，我其實住仁興街…即係廣福橋隔黎，火車博物館果度…
做咩一提廣福橋你就彈左彈? 做咩事…?
我唔係有心呃你地，但我同你地三唔識七，只不過搭左同一架小巴番大埔，點解要講咁多野你地知喎…
我住仁興街啲洗車房上面既舊樓，係啊，都住左好耐架喇…我果日落左小巴之後，有啲急事，所以咪快快趣同你地講byebye，即刻返返屋企先囉。
咩急事? 唉你地唔撚好理啦!
總次我同你地分別左之後，就快快趣返左屋企訓! 我一開始都好似司機你咁，以為｢鬼掩眼｣，諗住返去沖個涼，一教醒返就無事…屌，點撚知唔係!
我訓啊訓，一路訓到第日黃昏先起身；我諗果時都成4,5點喇，個天都慢慢黑緊…
我訓左咁耐真係好肚餓，所以果時我訓到成身大汗，係比自己餓醒既!
我拿拿林落街，諗住搵野食。點知出面乜都珊哂，咩都落哂閘無開。我本來好鐘意廣福道果度，有間魚蛋粉好正架!! 趁啲人唔見哂，我咪諗住去食個免費餐囉。
點知啲人好衰唔衰，岩岩就係淩晨2點幾先全部消失哂，搞到果時啲鋪頭已經落哂閘，除左廣福道間M記，就咩都珊哂…真係食撚屎。
果時我企係廣福道，個天岩岩黑緊，頂，明明啲路燈啊，紅綠燈啊果啲仲著緊，但就咩人都無哂，剩返我一個企係路中心，個FEEL都咪話唔驚!!
我有試過去間魚蛋粉度睇下，試下開唔開到佢個鎖，諗住可以爆格入去食都好啊…頂佢個肺，點知佢個鎖咁撚難開，無工具係手都真係開唔到…唯有死死地氣，都係去左對面M記果拎野食啦。
我不嬲都唔食M記既。愈黎愈貴，但係啲野又好似屎一樣咁難食…真係啊，佢果啲咁既所謂加大碼餐，其實除左個銀碼加大左之外，個分量根本就無加大過。
但無辦法啦，好肚餓，咁我咪求只入去拎左兩個漢堡包，又拎左小小薯條，返屋企食囉。
…咩話? 講咩話?
入，正，題?! 屌，我咪講緊入正題囉仆街!!
我返左屋企，諗住開個電視一路食一路睇。
點知開左個電視，台台都係雪花!! 無撚野啊! 原來個世界無哂人真係唔得，連電視都無得睇!!
我快快趣食完，突然間又有少少急事，咪諗住出一出去攞啲野，返黎先再訓囉! 果時應該就9點幾10點到…
…急事咪急事囉!! 問咁多做咩啫!!
頂，講你地都唔明啦!!
我真係好急，所以食完野，睇左一陣雪花電視就已經頂唔順，落左街，諗住去個攞貨既地方，睇下有無剩貨係度…
!!
屌，仆街。
係啊，攞貨啊! 明啦，唔洗我畫公仔畫出腸啊嘛?!
仆你個街啊，我唔小心講漏口啫，唔哂追住黎問啊?! 係啊…粉啊，海洛英，｢四號仔｣，「軟野」…你鐘意點樣叫就點樣叫啦…
得啦，你地無人當差架喇?!
其實我第一日落車果時，身上啲貨已經｢chur｣得七七八八，但又真係好頂癮，所以咪急急腳返屋企，諗住｢啪｣返兩枝｢嗎啡｣，頂住癮先…喂，皺咩眉頭啫，無辦法啦…條癮起係上黎，我都唔想架!!
我落左車既第一晚，返去已經｢啪｣左兩野嗎啡…嘩，之後好訓到呢…所以一起身咪已經第二日既夜晚囉…
講番呢度先…之後我食完飯，抖左陣，仆佢個街，條癮又起喎! 我不嬲｢chur｣開｢軟野｣既，｢嗎啡｣其實真係唔係我果範，我都係無野係身，先將就住既啫。
癮起，可以點啫，咪出街睇下有無貨囉!!
全世界既人唔見左，唔代表連全世界既貨都唔見埋架嘛! 無拆家係度阻頭阻勢，有免費貨拎，屌，咁咪仲好!! 發達啦今鋪!!
大埔呢帶既｢軟野｣，一向都係大麻輝睇既…係啊，佢個名叫大麻輝，但其實佢負責睇粉!
大麻輝係大中(大埔中心)度，不嬲有個檔，專放粉…佢好high架，好似做戲咁，將啲粉放哂係個公園度，佢就坐係公園門口，你入去時比錢，佢就會話你聽包粉放係邊，之後你就要自己入去掘，就算當場比差佬斷正，佢都可以話唔識你，自己甩到身啊嘛…呢啲咪醒囉!!
平時去個公園拎貨都要交入場費，今次連個收費人都唔係度，就好似入迪士尼個secure唔見左咁，頂，仲唔拿拿聲入去玩多轉!!
嗄? 咩公園? 咪八號花園隔離果個…叫咩啊…唉…
啊! 我知喇…
大埔舊墟公園!!
?
又做咩啊? 講廣福橋你又咁，講舊墟公園你又咁…?
果時天都已經黑哂，我急急腳由廣福橋過河，直接係汀角路入口，跑左入去個舊墟公園度…
我地呢啲幫襯開既，當然知道大麻輝啲貨會放係邊啦!! 佢黎黎去去都係放果幾個地方…唔係坑渠底，就埋係棵樹下麵! 所以我咪即刻跑去遊樂場隔離個坑渠底度，check下有無囉…
點知我連續揭開左幾個坑渠蓋，入面咩都無!! 係啊，個坑渠入面，除左坑渠水就真係咩都無!! 仆佢個街，我點會估到大麻輝連臨消失之前，都要帶走哂佢啲貨先消失架!! 好心唔好咁自撚私喇!! 屌。
我唔服氣啊，所以咪又跑左去棵樹下面，睇下會唔會仲有貨埋左係度!!
果時夜晚，你地知舊墟公園入面啲燈光又好暗架啦…我坐係草叢入面既一棵樹底，雙手係咁掘係咁掘，諗住會唔會有機會掘到粉…
掘到成手都係泥，隻手比地下d野｢參｣到成手損哂，點撚知連半包粉都搵唔到，仆佢個街。
就係呢個時候，我聽到啲聲…
仆街，真係諗番都心寒。
我聽到有人係度講野!!
唔係一個…唔係兩個…而係…頂，我諗至少有成十幾個人係度講緊野…
嘰嘰咕咕嘰嘰咕咕嘰嘰咕咕嘰嘰咕咕…
就好似，有成班人係度竊竊私語，咬緊耳仔!!
我果時籬埋左係棵樹後面，第一反應都好似你地咁，寒左一寒，但隨即又諗…會唔會係救兵呢?!
諗到呢度，我就繼續訓係個地度，好似人地啲｢海陸陸戰隊｣咁，沿住塊地慢慢向前爬，諗住睇下究竟係咩人…
我一路爬一路爬，啲人聲就愈來愈大聲，愈來愈清楚…
嘰嘰咕咕嘰嘰咕咕…嘰嘰咕咕嘰嘰咕咕…
係啊，佢地真係講緊野!! 不過我一句都聽唔明…
因為佢地講緊日文!!
呢個時候，我已經爬到去個山坡邊緣，再向前爬，就已經係行人路，我停左落黎，向行人路望過去…
我見到佢地!!
大概有十四、五個著住黑色西裝既人，企左係條行人路中心度!!
最恐怖係…佢地塊面全部都帶左個黑色既防毒面具!!
係啊，真係好撚恐怖!!
個防毒面具上面個眼位都同埋個嘴位，岩岩就係三個對稱圓形，遠睇就好似一隻三個圓圈既怪物，豬鼻嘴型，兩大一小…!!
真! 我無呃你地!!
最恐怖係，呢班西裝防毒面具人，唔係就咁企左係度傾計咁簡單…佢…佢地係度，抬緊啲野!!
當時佢地分左成兩批人，一批前一批後，搬緊個白色既帆布擔架…
個擔架就好似醫院做急救既果種，上面訓左個人!!
我開頭都睇唔清果個究竟係咩人，但佢地搬啊搬，搬啊搬，一路經過左枝街燈下麵時，屌，果啲橙色燈光一照，我就認得果兩條友究竟係乜水喇!
就係同我地一齊搭小巴番黎，成撚日摣住個手袋果條女啊!!
當時佢郁都唔鬱，遠睇好似死左咁訓左係個擔架上面…最恐怖係，當時佢唔知做乜撚野，成身都係紫斑!!
班防毒面具人完全無為意我既存在，繼續向前搬…照佢地行緊去八號花園個方向，佢地應該係想將條女搬出公園。
就係呢個時候，當第二張擔架床經過枝街燈果陣，我又見到上面究竟訓左邊個…
你地記唔記得，咪有對好嘈既夫婦，坐在係小巴車頭度既!!
仆街!! 係佢啊!! 果個男人啊!!
佢又好似死左咁，訓左係張床上面，郁都唔鬱…問題係，佢條頸上面，都一樣生左啲紫色斑紋!!
我當時見到呢幕，成個已經嚇到彊哂，郁都鬱唔到。
…唔係啊，我當時真係好驚班防毒面具人會見到我! 我驚佢地會將我殺埋!
我果晚由舊墟公園返屋企，成程路都係跑架!! 屌，幾驚班人會追上黎啊!! 當我返到屋企既時候，應該都差唔多成12點…
粉又搵唔到，個心又未驚完，我咪唯有再｢啪｣多野嗎啡，頂住癮先囉。
好彩仲有最後兩枝…如果唔係，我果晚一定訓唔著!
我1點幾訓，醒果時，又已經差唔多係第二日既1點幾2點…係啊，｢啪｣完野個腦真係好爽好迷，完全唔記得哂之前果晚見到既事…到起身果時，又係因為自己肚餓而整醒。
無法啦，唯有起身，落街睇下搵到咩食…
果時我雖然肚餓，但又真係對M記啲濕9薯條好抗拒，唔想再食，我真係好想食廣福道間魚蛋粉；所以我臨出門口前就醒啊，帶左個剪鎖器…
我快手快腳去到廣福道間魚蛋粉度，剪爛左佢個鎖…唉，呢啲普通食肆，個鎖會有幾難開啊!!
我剪爛左去個鎖，｢嘭｣一聲就開左佢道門…頂佢個肺，你估我見到咩?
乜都無啊!!
屌，間野入面啲枱啊，凳果啲，全部都好似打完仗咁，周地都係，好亂…然後仲要封哂塵…好似好耐都無人黎過咁!!
喱…就好似｢那打素｣呢度囉…成地都係呢啲床啊，紙啊咁…好似打完仗咁，都唔知做咩事。
我行入去廚房度，諗住睇下佢有無啲湯底啊，麵啊果啲仲滾住…你地知啦，通常啲餐廳個湯底唔會倒，一路滾住滾到世界末日架嘛!!
頂佢個肺，入面咩都無!! 連個湯底都無埋!!
我唔信邪，呢間魚蛋粉唔得，我咪試隔離間餐廳囉!
我急急腳行出左魚蛋粉，去隔離果間同樣落左閘既餐廳，一個唔該就剪鬼爛左個鎖。
仆佢個街!! 入面又係咩都無!!
啲枱凳又係打哂風，跌哂係個地度，又係成地都係塵!! 個廚房入面，又係咩都無得食!! 頂佢個肺!!
我果時真係好好好肚餓，望住廣福道對面間麥當勞，個紅色黃色招牌係度閃下閃下，真係好諷刺。但我做人好有骨氣，話唔食就唔食，就好似果個龐一嗚咁，即使餓死，都唔會幫襯呢啲仆街大財團既!!
我突然醒起，過幾條街，就係新街市對面，有間茶餐廳係24小時營業，佢啲蘋果批同雞批都好正!!
一言驚醒夢中人，我即刻起行，離開左廣福道，穿過廣福裡，向鄉事會道出發。
嗄? 幾多點?!
哦…果時，我諗應該都係1點半2點左右。
我行啊行，行啊行，穿過左廣福裡，就黎去到果個賣波鞋既轉角位時…係啊，咪就係新街市對面，豆花鋪再落小小果度囉…
我一轉過角位，就見到有個人企左係我前面!!
仆你個街!! 佢著住成身黑色西裝，頭戴防毒面具…
真係啊，有個防毒面具人企左係條路中心，就係我前面唔夠十米!!
佢果時迎面向我行緊過黎，好似係去緊寶鄉道果邊…屌，唔知喇，總之我一轉彎就見到佢，撞到正一正!!
唔洗講，我緊係當場比佢嚇到淆撚哂底!! 硬生生企係果邊!!
如果你地係我，你會點?!
我大約停左係原地半秒既時間，腦入面不斷諗緊，諗下到底有咩方法可以甩身…
然後，正所謂說時遲那時快，大概係半秒之後，我已經右手摣住左枝剪鎖器，向前對住果個防毒面具人，向前衝!!
無錯，向前衝!!
我宜家諗番，都真係唔明我當時點解會咁勇…
或者係因為前晚先岩岩見完果啲防毒面具人殺人，手上咁岩又拎住枝野，心入面一路諗住唔死，唔想好似條女同埋個男人咁，慘遭班防毒面具人毒手…
所以，無啊，點啫…
咪屌拿媽，頂硬上囉!!
我一手執住個剪鎖器，跑到去個防毒面具人前面，黎手就歐落去!!
個防毒面具人好似估唔到我突然間會攻擊佢，就咁企左係原地…
｢xxxxxxxxxxx!!｣ 佢無啦啦叫左句，我聽唔明既日文。
就算聽得明，我都唔會理佢，黎手歐落佢個肚度…
｢啊啊!!｣ 佢即刻叫痛，大嗌出黎。
頂佢個肺，未打過佢地，都唔知原來防毒面具人咁弱雞!!
我一下得手，立即彎腰，又再歐多野，今次向佢右腳，上5吋下5吋個位都敲落去!!
今次你仲唔仆街?! 我右手大力揮落——
｢卜。｣
係一下沉實既撞擊聲。
｢啊啊啊啊啊!!｣
佢又再大嗌，如果唔係掩住左個防毒面具，我諗會見到佢痛到標眼水。
我當然唔會比佢嗌得耐，佢未嗌完，我右手又已經黎料…
今次輪到左腳!!
｢卜…喇。｣
沉實既撞擊聲，另加一下好似咬碎薯片既聲；如無意外，係骨折。
｢啊啊啊啊啊啊啊啊啊啊啊!!｣
即使我聽唔明佢既日文，但佢呢句既｢啊｣，係呢刻，就已經係世界既最共通語言。
兩隻腳都比我打殘，個防毒面具人一路｢啊｣，一路跌落地。
但我無停手，佢一路跌，我就一路歐枝野落佢個肚度…
｢卜。卜。卜。卜。卜。｣
一下一下，敲落佢個肚度。
防毒面具人呢個時候已經痛到嗌唔到，淨係識得傷手護住個肚，個身屈埋一舊，跌左落地。
我行埋佢身邊，踎低，望住佢。
就係個黑色防毒面具既雙眼位置，果兩個大大既玻璃圓形後面，我見到佢對眼；黑白眼珠，好似好辛苦咁皺住眉頭，同我對望住。
於是我放低左個剪鎖器，伸出雙手，開始除低佢個面具。
************************
｢…咪住先，你又除低左佢個面具?!｣ 我伸出右手，示意白粉友停下來，一臉詫異地問。
｢又? 咩又? 你都試過咩?!｣ 白粉友莫名其妙。
我皺著眉頭，緩緩搖頭，一臉難以置信問:
｢…你唔係講緊，係塊左邊面度有個好大既紅色胎記，果個日本人啊嘛…｣
｢嗄?! 你都見過佢?!｣ 白粉友問道。
我無奈點頭道:
｢唔止，根據yuki既翻譯，條友仲自稱係我小學同學，細個同我一齊玩既老朋友添…｣
白粉友傻了眼的看著我和yuki，似是難以明白我剛剛說的到底是什麼。
這我不怪他，畢竟不只他，就連我自己本人，也難以明瞭那晚｢胎記仔｣說的到底是指什麼…
可憐的｢胎記仔｣，居然會在24小時內，給兩幫不同的人痛揍了一頓…先別問他到底是什麼人，可就看現場所發生的事，我能斷定，他天生定是個不幸的人沒錯。
｢…你小學同學?!｣
白粉友瞪大雙眼，誇張地看著我:
｢佢連中文都唔撚識喎!! 邊有可能係你小學同學?!! 你細個係日本生活架咩?!! 屌，原來你架仔黎啊?!｣
我連忙揮手，否認道:
｢莫講話你，連我自己都唔知條友究竟講緊咩…我一出世就已經係大埔住，廿幾歲人，都係前年先第一次同女朋友去東京旅行，個架仔係我小學同學…真係仆佢個街，原全無可能!!｣
我側過頭來，定眼看著白粉友，想像著他痛歐防毒面具人時的狂暴情況；頓了一頓，又問:
｢所以，你除左佢個防毒面具，之後呢?! 迫佢供啊? 就係佢叫你黎『那打素』既?!!｣
白粉友舉起右手，先是用食指搔了搔自己的鼻尖，雙眼沒勁的看著我:
｢…屌，咪住先，如果佢真係你小學同學，就大檸樂喇…｣
我奇怪，皺著眉頭，看著他，問:
｢…點解?｣
只見白粉友點了下頭，一臉不好意思的說道:
｢…因為? 因為我殺左佢。｣
************************
正確啲講，我已經殺左佢。
當我除低佢個面具時，面具背後，佢已經成塊面都係血。
我諗我打得太激，佢頂唔順就已經係個面具入面狂嘔血，成塊面同成個面具都係血…頂，諗番都覺得核突。
我彎低身，好奇望住佢，佢又訓左係個地下度，一臉痛苦咁望住我。
除左佢面具先發覺，原來佢咁後生，開頭仲以為佢係個中坑添。
我果時仲好奇怪，點解佢臉上面啲血有兩隻色…睇落先發覺，原來後面深色果啲唔係血，而係一噠好大塊，形狀好似澳洲板槐大陸咁既棗紅色胎記。
呢個時候，條友成口血絲，不斷係度大嗌:
｢xxxxxxxxxxxxxxxxxxx!!｣
我企返起身，居高臨下望住佢:
｢你慳啲啦，我唔識聽日文架!!｣
講完，我｢骨吐｣一聲，吐左啖口水落佢度；佢無理，繼續大聲嗌:
｢xxxxxxxxxxxxx!! xxxxxxxxxxxx!!｣
我大力踢左佢一下，大聲鬧:
｢屌你我都話唔撚識聽囉，聽唔明啊仆街!!｣
然後，我唔知佢係識聽我講野定點，佢突然轉channel，成口血絲，勁虛弱咁同我講:
｢…in…in…si…de…in…si…de…｣
Inside?!
｢乜撚野inside啊，噏乜啊?!｣ 我大聲問。
｢IN…SI…DE…!! IN…SI…DE!!｣
佢嗌得聲嘶力竭，舉高右手，指住自己件西裝外套…
｢IN…SI…DE…!! IN…SI…DE…!! IN…SI…DE!!｣
我皺皺眉頭，再次彎低腰，用手揭開佢件西裝外套，睇下佢究竟係度指緊啲咩…
…唔知點解，佢隻西裝質料同平時西裝既布料，感覺上好唔同…佢果件隻料好似厚好多，｢線｣手好多…
｢嘩…你著住件咁厚既衫，唔撚熱架?!｣
就係呢個時候，係佢西裝既內側位置，我見到一部銀白色既長方形儀器…
Ipad?
真係啊，果部野真係好似Ipad，又係一個薄薄地既長方形，上面一大個mon…
我黎手就攞起左部Ipad，摣住黎研究…
｢xxxxxxxxxxxxx!! xxxxxxxxxxxxx!!｣
條友又係度繼續9叫。
我無理到佢，直接係部Ipad下面個圓形制度，拑左下。
部機個mon本來都係黑色無野既，但當我一拑，就好似正常Ipad咁，即刻著左。
之後，你地估我見到啲咩?!
個mon一著左，上面係一張又一張既相!!
唔係邊個…而係我地自己既相啊!!
真係啊!! 拿，入面有我就唔再講啦，亦都有哥仔你啦，司機大佬你啦，靚女你啦…仲…仲有全部人!!
屌，總之成撚架車都有係度啦!!
我真係數過，果度總共有成17張相，全部都係彩色，好高清既相，就咁好似人地啲証件相咁，影住我地個樣。成架小巴既乘客，夾埋司機你，岩岩好17個!!
毎幅相下面都寫左幾行既文字，裡面又夾雜左啲數字…不過仆佢個街，全部都係日文，我睇唔明。
但呢啲都唔係重點，重點係，果17幅相，咪話全部係彩色高清既証件相黎既…問題係，係3張相上面，竟然打左個黑色大交叉…
我開頭都唔明到底係咩意思，但我睇真啲，發現公園入面見到既一男一女，即係死左果一男一女呢…佢地幅相都打左個黑色大交叉!!
一見到咁，傻既都知，個黑色交叉代表果啲人已經死左!!
呢班防毒面具人到底係咩人，點解佢地會有哂我地啲相!? 仲有，點解佢地要整張list出黎，一個一個咁殺?!
…大屠殺?!!
講時講，我地身體入面會唔會真係好似做戲咁，比人裝左個體內引爆器，只要佢地一拑制，我地就會成個人爆開，仆街陷家產?!
如果係咁我地就玩撚完架喇喎?!!
然後，就係呢個時候，個日本仔又突然嗌左句野…
｢NE…THE…NE…THER…SOLE!! NE…THER…SOLE!!｣
我望住佢，完全唔明佢究竟係度噏緊咩:
｢咩話?! 你講咩話?!!｣
｢NE…THER…SOLE!! NE…THER…SOLE!!｣ 佢成口都係血絲，嗌得聲嘶力竭。
我當時真係聽唔明佢究竟係度講緊咩，｢Nethersole｣原來就係指｢那打素｣，我都係後來先明白...
就係呢個時候，我突然留意到，個日本仔既左耳，原來帶住個黑色耳機…係啊，耳機，就好似啲阿叔係馬會外面聽馬咁，掛住部黑色單邊耳機!!
｢NE…THE…NE…THER…SOLE!! NE…THER…SOLE!!｣
頂，原來個架仔根本唔係同我講緊野，而係用緊個耳機同人溝通…
求救?!!
我當堂把鬼火，行上前快手將佢個耳機隨落黎…
｢頂你個肺，call馬?!! 嗄?!! 死到臨頭仲學人call馬?!!｣
我丟左部Ipad，拾番起枝剪鎖器，諗住再歐多兩野佢嘆…
************************
｢等等，好撚有問題!!｣
聽到此時，小巴司機突然舉手道；白粉友立即停住，大夥兒轉頭看著他。
｢…屌你…我唔知係你搞錯定我地搞撚錯左啦…｣
小巴司機側著頭，邊搔癢邊說:
｢但如果真係好似你咁講，對番條時間線…下晝成1，2點果時，我地應該仲係寶鄉道間茶餐廳度喎!! 果時我地連大帽山都未上，個日本仔點撚解會知道落黎之後會炒車，點撚解知道阿信會要黎那打素止血?!!｣
我聽著小巴司機的話，微微點頭。
對，小巴司機說得有理；他這番話，應該是這三天兩夜以內，除了爆粗外，說過最有建設性的話。
是的，沒錯，那是今天下午的事。
那時候，我們大夥兒還身在寶鄉街的茶餐廳內，聽著｢飛機昱｣的姦屍告白，什至連大帽山也還沒決定要上…這｢小學老朋友｣，怎麼可能會知道我們將會發生的事?!!
｢那打素｣這隻字…到底是怎樣來的?!
當我想到這裡，一陣熟悉的爭執聲音，驀然從我心底翻起…
那是…才幾個小時前所發生的事…
…茶餐廳內，給中年男子揍到頭破血流的｢飛機昱｣，正趟於格仔紙皮石的地板上，自己的血泊中，奄奄一息。
我激動衝往桌子那邊，推開幾個人，直至來到小巴司機旁邊停下。
我猛烈揪住了他，大聲問道: ｢你今日有無渣車黎啊?! 有無啊仆街?! 答有啦!!｣
小巴司機先是呆了一呆，似是給我突然衝來抓住他的這個行為嚇倒了。
｢有…我有摣…｣
我急忙指著遠方地上正在流血的潮童，向小巴司機喝道:
｢咁仲等咩啊?!! 快撚啲渣架車過黎，車佢去醫院啊!! 去那打素啦!! 快撚啲啊仆街!!｣…
?!
…難道，是那時候?!!
白粉友說那個日本人正聽著什麼耳機…難道他正在遠距離的竊聽著我們的對話?!! 時間上，完全吻合!!
｢唔撚係啊?!! 個日本仔一路聽緊我地講野啊!?｣
我情不自禁的詫異叫了出來，大夥兒立即轉頭看著我…
｢嗄? 咩話?!｣ 白粉友莫名奇妙。
｢個耳機啊!! 條友一路偷聽緊我地講野啊!! 果時個MK比你地打到仆街，訓左係地度，流哂血…我先係咁話要車佢去那打素!! 頂，我諗個日本仔用啲唔知咩方法，聽到我地講野!!｣ 我激動叫道。
｢…監…聽?! …仆佢個街…竊聽風雲?! 頂，會唔會真係比你講中左，我地身體入面係有個偷聽器?!｣
小巴司機面如鐵青，邊問邊舉高雙手，嘗試察看他的手臂有否給人植入了點什麼。
我先沒理會小巴司機，徑自步上前，向白粉友問道:
｢咪住先，你講埋落去…之後又點?! 點解你最後又會黎左那打素?!｣
************************
我拾番起枝剪鎖器，行左去佢隔離，諗住再歐多兩野佢嘆。
｢NE…THE…NE…THER…SOLE!! NE…THER…SOLE!!｣ 佢不斷聲嘶力竭咁嗌。
我望住佢，正準備舉起枝剪鎖器，給予佢最後既致命一撃時，突然諗到啲野…
咪住先，咪住先…
我部電話入面，好似有｢翻譯器｣呢個apps喎!!?
屌!! 點解唔早少少諗起?!!
我即刻係褲袋入面拎左部電話出黎，解鎖，開左個｢翻譯器｣，輸入英文:
｢who，are，you｣
我將個翻譯語言set左做日文，然後放段聲佢聽…
｢xxxxxxxxxxxxxxxxxxx｣
生硬而冰冷，個apps原來係女黎。
條友見到我咁樣做，好似無咩反應，依然故我，繼續用佢自己既溝通方法黎大吵大鬧…
｢xxxxxxxxxxx!! xxxxxxxxxxxx!! xxxxxxxxxxxx!!｣
我即刻錄低佢段野，翻譯出黎…
｢Don’t kill Don’t kill Please Don’t Kill｣
見到句咁既野，我即刻屌番轉頭:
｢唔好殺你?! 頂你個肺，咁點解你班人又要追住我地黎打啊?! 嗄?! 你地究竟係咩人，點解要追殺我地?!!｣
然後，佢成口血絲咁又爆左句:
｢xxxxxxxxxxxxxxxxxxxxxxxx!! xxxxxxxxxxxxxxxxxxxxxxxx!!｣
我即刻將段聲錄低，翻譯…
｢ I am on the good side We are the good guys You evil murderer｣
屌，噏乜柒啊?!!
與此同時，條友又突然嗌左句新野:
｢ Nethersole xxxxxxxxxxxx!! xxxxxxxxxxxxxxxxxxxxxxxxx!! Nethersole xxxxxxxxxxxx!! ｣
我雖然唔識日文，但都聽得出，呢句野同之前唔同，因為入面多左隻英文字；
我又即刻將佢錄低左，翻譯…
｢ Meetup at Nethersole Rest of them will be there Nethersole meeting place｣
要知道，我當時仲未明｢Nethersole｣原來就係指｢那打素｣既意思，所以對於當時既我黎講，胎記仔既呢段說話，係完全聽唔明…
｢頂你個肺，有翻譯機係度都可以講到一pak屎咁，你食撚屎喇!!｣ 我激動鬧。
我把鬼火，正想再錄啲咩比佢聽果時…
突然感覺到，有野｢鏈｣住左我條頸!!
｢啊啊啊啊啊啊!!｣
仆佢個街，條日本仔一路大嗌，一路勁用力咁摣住我條頸…口入面既血絲，已經全部噴哂落我度。
我估唔到佢會突然咁癲，連手上面摣住既手機都跌埋落地…
｢啪喇…!!｣
我嘗試掙紮，但佢實在｢鏈｣得太用力，我就快連氣都透唔到；我成個人跌左係地下，塊臉上面全部都係佢啲仆街血絲…
｢xxxxxxxxxxxxxxx!! xxxxxxxxxxx!! xxxxxxxxxxxxxxxxxx!!｣
佢失哂控咁不斷大嗌。
我雙手不斷係地下度摸，嘗試睇下有無咩可以用黎反撃…
千鈞一髮間，我摸到枝冷冰冰既硬物…
剪鎖器!!
我即刻拾起枝剪鎖器，握緊，大力歐落佢個頭度…
｢卜。｣
悶實而沉重既一下撞撃聲。
我感覺到｢鏈｣住自己既果雙手變得無力，慢慢鬆開…握住剪鎖器隻右手手指，感到有啲冰冷。
我起身，拾起剪鎖器，發覺原來枝剪鎖器已經插左係個胎記仔既｢天靈蓋｣度…
剪鎖器係我唯一既旁身武器，我唔可以就呾放低佢。
｢蚊｣出枝剪鎖器既果刻，胎記仔頭上既血把把聲湧出，血流如泉，沿住枝剪鎖器既柄，一路流落我隻手。
我兩隻手掌，一早已經比佢染到成塊都係鮮紅色…
仆街，我一野撲死左胎記仔。
太陽光下，望住佢死唔眼閉既樣，佢自己既鮮血不斷沖洗緊佢自己塊面…我呆滯咁企係原地，難以接受我岩岩殺左一個人既事實。
但係畢竟都叫做死左人，其他防毒面具人可能會好快收到風殺到，繼續留係原地唔係明智既決定。
為免比其他防毒面具人見到，我無將佢條屍就咁放係路中心，而係快快手拖左佢入隔離一條巷…我返轉頭，諗住執番部手機，發覺原來已經跌到碎哂…我屌，早知買NOKIA。
我決定立即離開波鞋鋪，離開廣福裡，快快趣趣去茶餐廳，求其攞啲野食就立即返歸。
我沿住鄉事會道一路向前跑，經過新街市，心入面一路祈求，希望間茶餐廳真係有開…
終於，就係鄉事會道街尾，我見到一間殘舊既茶餐廳，門口著緊橙紅色既燈光…
屌老母芝士漢堡，真係有開!!
我勁激動咁衝左入間茶餐廳，就係拉開玻璃門既果一刻，先突然發覺，就連呢間茶餐廳都有啲唔妥…
我見到茶餐廳中間最大既果張圓枱，佢周圍既所有凳都比人搞亂哂…枱面上仲放哂啲食剩同飲剩既杯碟…
好明顯，曾經有人黎過!! 而且，仲係無耐之前!!
見到咁既情況，我當堂驚左驚，淆哂底，下意識覺得呢度就係果啲防毒面具人既聚集基地…
佢地走左無耐…好有可能仲係附近!! 唔係，好有可能就係因為聽到個胎記仔既求救，知道佢比我襲擊，所以先臨時出哂去!!
今次食屎喇，佢地一定係度搵緊我!!
我諗都唔諗，即刻衝左去門口塊玻璃前面，求其拎左啲蘋果批，雞批啊果啲 (當時玻璃架上已所剩無幾，相信係啲仆街防毒面具人食哂)，求其將佢地擺撚哂落個盒度，入膠袋，即刻推門走...
我成手都係血咁拎住袋餅，穿過寶鄉街，沿住南盛街咁一路向前跑…跑返屋企。
…屌你老尾，我落街諗住搵野食啫，點撚知道連人都殺左個!!
當我返到屋企果時，外面個天都已經黑黑地…
我開頭仲奇怪，點解今日太陽會收皮得咁快，點知一睇，先發覺原來外面個天已經灰哂，好似積聚緊啲汙雲咁，一陣山雨欲來既感覺…
我企係個廳，望住成個膠袋都係我自己既血手印，當堂無哂胃口，連野都唔撚想再食。
奇就奇在，我雖然唔想食野，但就覺得好口渴，而且仲愈黎愈口渴…渴到連手都震埋…
我開始覺得頭暈，係咁流鼻涕，就連我洗緊隻手上面既血跡果時，隻手都係咁不斷震緊…
就係呢個moment，我終於知道究竟咩事…
…仆街，咁快又黎料?!
始終｢嗎啡｣唔係我本行，無耐前先｢啪｣完一野，條癮宜家又已經再起…
問題係，我已經無哂貨!! 就連最尾果兩枝，琴晚都因為淆底得濟而比我｢啪｣撚哂!!
我愈震愈激動，頂唔順，終於跌撚左係沙發度，發哂冷汗係度抽搐…
我嘗試搵啲野黎咬，搵啲水飲，但都無咩作用…屌，訓係張沙發上面，成身都係汗，想訓又訓唔到，輾轉反側…真係好辛苦!
唔得，咁樣落去唔係辦法…
我一定要搵到野黎頂一頂癮…就算係半枝咳藥水都好…就算係美沙酮…都好撚過無!!
咪住先…咳藥水…美沙酮…陷世界啲鋪頭都珊哂，連診所都無開，邊撚度搵呢啲野啊!?
就係呢個時候，迷迷糊糊間，一隻中文字突然浮現係我腦海入面…
｢那打素醫院｣
同一時間，我都突然諗起胎記仔臨死前，不斷狂嗌既果隻英文字…
｢Nethersole｣
仆街，佢唔撚就係講緊，｢那打素｣啊嘛…
但係我唔理得咁多，呢個時候，我條癮已經起到仆街，一諗到醫院係唯一有咳藥水同嗎啡既地方，成個人即刻有哂目標，有番少少繼續生存既意智。
我唔理得咁多，即刻搵左個背囊出黎，隻手一路震一路pack野，求其帶左幾支水，帶埋盒蘋果批，摣住枝剪鎖器係手就出發!!
一落到街，個天已經開始落緊毛毛雨，但為左頂癮，我唔理得咁多，懷住摩西帶以色列人分紅海既決心，死都要行到去那打素!!
屌，即使係宜家諗起都覺得自己癲，要一個虛緊脫，頂緊癮既道友，係風雨中由仁興街一路行去｢那打素｣，呢個簡直係挑戰人體極限既超級創舉…
雨愈落愈大，如果天文臺台長未消失既話，見到呢場雨都應該會比｢紅雨｣。
途中有好幾次，猶其係我仲要行撚錯左路，去左富善果邊，我都差啲想放棄，求其訓係度食風食雨，死撚左佢好過…
但最後，憑住頂癮既目標，成功激起我既求生意智，奇蹟咁終於行到黎｢那打素醫院｣…
然後，發現成間醫院都落哂閘，鎖撚哂。
…連醫院都落閘?!!
好撚彩我夠醒，一直都有帶剪鎖器旁身…如果其他鋪頭既鎖都可以剪得到，公立醫院既鎖，都應該唔會係問題!! 好似係!!
我一路頂癮，一路行到去個醫院正門度，彎腰剪鎖。
然後，就係呢個時候，正當我聚精會神剪緊鎖果時，背脊突然傳黎一陣奇怪既聲…
嗶嗶嗶，嗶嗶嗶，嗶嗶嗶，嗶嗶嗶…
真架，我無呃你地，真係咁既聲。就好似啲私家車防盜器咁，唔同既係，佢唔止係單一個聲音源頭，而係有好多架私家車咁，不斷一齊係度響緊!!
我開始仲以為係自己剪鎖，觸動到佢地啲防盜系統，所以先會突然間響…宜家諗番，我估其實應該唔關事?!
我即刻停手，擰轉頭，睇下究竟發生乜撚野事…
我見到醫院周圍，一枝又一枝既燈柱上面，唔知點解，佢地都係咁係度閃緊!!
果時實在落緊太大雨，啲雨水好似一層層既薄紗咁，阻撚住我睇野…但隱約可以見到，係一枝枝既燈柱上面，唔知點解，竟然安裝左一個我從未見過既圓形鐵盒!! 而呢個鐵盒，果時就不斷係度閃緊同怪叫緊!!
嗶嗶嗶，嗶嗶嗶，嗶嗶嗶，嗶嗶嗶…
啲燈又藍又白，就好似人地警車啊，救護車果啲光。
一睇到呢個匪夷所思既情境，我即刻淆哂底，以為係防毒面具人啲唔知咩裝置，終於殺到上黎。
我拿拿林轉身繼續剪鎖，｢噠｣一聲剪斷左，即刻開閘，衝撚左入去個醫院度…有邊個會諗到，醫院份面既情況竟然會係更加匪夷所思?!
成個走廊都擺滿哂病床，一地都係紙啊、衫啊咁，又係好似打完仗一樣…呢啲野，你地都親眼見到，唔撚洗我再覆述架喇。
就係呢個時候，瀕臨崩潰邊緣既我，終於入到黎醫院，話之佢打過仗定咩，即刻狗衝一樣跑左去急症度，睇下入面有無｢嗎啡｣…
************************
｢…嗯，無拿? 之後呢?｣
聽到這裡，看著那突然止住的白粉友，我忍不住問。
白粉友定眼看著我們，雙手攤開，理所當然道:
｢…咁大家見我生勾勾企左係度，証明我最後都無事，大步檻過啦…｣
｢屌，檻乜撚野啊，道友就道友，吸毒就吸毒啦，好似講到自己創舉咁，吸個粉以為自己登陸月球，收撚皮啦!｣
小巴司機突然開口，奸笑道:
｢頭先見你失驚無神比我地嚇撚醒左，擺到明又打完針，係到訓緊教啦仆街…｣
此刻看著小巴司機與白粉友的同台出現，我突然有個慾望，很想看到他們二人以廣東髒話來辯論的情景…猶如西門吹雪及葉孤城的決戰，不知他們二人唇槍舌劍，到底誰勝誰負?!
白粉友沒有理會小巴司機的言語攻擊，面向我和Yuki，徑自說道:
｢…其實仲有小小事，就係我搵緊嗎啡針果時，係急症入面搵到既。｣
白粉友的話瞬間取得我的注意，我立即轉身，重新皺起眉頭的，看著白粉友…只見白粉友動身走回那張給推翻了的病床旁，蹲下來，從下麵拖出了個深綠色的長形東西。
是個背包，相信就是他自己帶來的那個。
｢…搵到野? 睇過…搵撚到咩啊? 我地呢啲良好市民，對果家野唔好架喎…｣ 小巴司機又忽然插嘴，｢…呢啲野，我係唔會試架，仆街。｣
對於小巴司機的冷嘲熱諷，我和Yuki都沒作理會，徑自繼續把目光放在白粉友身上。
未機，白粉友從背包後而，拿出了個黑色的什麼；那物體只有兩部手機大小，左上方連接著根銀色的長條天線…
收音機?!
看到如此一部收音機，我立即就猜到，白粉友到底要向我們示範什麼…
可慢著!! 如果所有人都消失了，那電台裡面的所有人也都會給消失了啊。
按理說，大氣電波裡的所有頻道，要不就該給關閉了，要不就已經是片空白的雜音吧…原理就跟那沒有信號的電視頻道一樣，當再沒有人在操作時，所有頻道也只剩一片無意義的雪花…是吧…
那麼，白粉友此刻要給我們看的，到底是…
就在此時，未待我繼續想下去，握著收音機的白粉友卻已經開口講話:
｢…我唔係有心發現，而係當我行入去個急症時，佢已經插撚左係塊牆上面個插座度，自己開著左，播緊野。｣
說罷，白粉友伸出了右手食指，｢啪｣的一響，按著了手上的收音機，一如所料，收音機立即播出一段無意義的空白嘈音:
｢沙…………………………………!!｣
｢然後我『啪』完針，瘟瘟鄧鄧果時，多手走去拆撚左佢落黎…｣
白粉友邊說邊把手調教，扭動著收音機頂端的圓形滾輪，嘗試找尋頻道…可有用嗎?
｢沙…滋滋滋……沙……滋………!!｣
收音機發出著刺耳的白音。
｢我當時又係好似宜家咁，係度鳩擰緊部野，睇下會唔會聽到啲咩啦…開頭我都預撚左會咩都聽唔到，好似人地電視台，無撚哂人，都得啲雪花啦…｣
白粉友的手指繼續扭動著，在嘈音與嘈音之間遊走著…
然後，就在此時，收音機那端，驀然傳來了點什麼聲音…
｢沙…滋滋…嗡嗡嗡…沙…嗡嗡……｣
聽到此聲音，白粉友突然興奮起來，激動道:
｢…無錯!! 就係佢喇!! 屌，講你地都唔信啊，開頭聽到呢啲聲，我仲以為自己high得濟啊仆街。｣
我緊皺眉頭，嘗試細聽那奇怪的聲音…
｢滋滋…嗡嗡嗡嗡…沙…沙…嗡嗡嗡嗡…｣
那聲音自遠至近，愈來愈大聲，音域高廣，輕柔透明…
慢著…這種聲音…
對，我想起了!!
我抬頭看著白粉友，激動道: ｢長笛!! 呢種係長笛聲!!｣
只見白粉友正聚精會神的聽著那聲音，徑自把手指放在口唇前，示意叫我安靜聽下去…
我懊惱無比，完全想不透，這死城的大氣電波中，幹嘛會突然有根西洋古典樂器的聲音…
然而，我的疑問並不待久，因為就在此時，頻道中的聲音卻突然改變了…應該是說，在長笛的背後，加上了個澎湃的聲音…
那是一陣華麗的弦樂聲。
什麼!? 怎麼是首西洋古典曲子?!!
典子愈去愈大聲，旋律愈去愈曲折，卻又愈去愈熟悉…慢著!! 這首曲子超熟!! 我曾經在那裡聽過幾百遍!!
這首是…對!! 我想起了!!
我驚訝抬頭，視線巧合掃過了Yuki及小巴司機，二人臉色同樣驚訝。
我轉頭的著白粉佬，大叫道: ｢…呢…呢首係，Greensleeves!!｣
此時，身旁的Yuki也猛地點頭，聲音顫栗道: ｢…果…果時考Listening…會考…A-Level…都…都係呢首歌…｣
我繼續聽著電台，聽著那古老而熟悉的旋律…
對，這鐵定是Greensleeves沒錯!! 還要是｢考評局｣當年的那個啥1962年｢倫敦小交響樂團｣的演奏版本。
此時此地，事隔多年，再次在如此匪夷所思的死城環境內，聽著同一首曲子，感覺竟是那麼的超現實，卻又無比的熟悉…!!
這首本應是蠻好聽的傳統英格蘭民謠，托｢考評局｣的福，竟然變成了公開考試的中英語聆聽考卷中，什麼九屁不通的確認電台頻道訊號(又稱，｢香城中學校 歌」)，以致在模擬或是真實考試中，毎個考生都至少要聽它兩百遍，直接成為歷來數以百萬計的香港學生，他們心目中的永恆夢魘…
那怕它的作曲人是誰，那怕經過多少百年的歷史，也應該會想從墳地裡爬起，把｢考評局｣內的戇鳩決策人絞死吧。
…?!!
嗄?!! 為什麼會聽到這個?!
有沒有能夠告訴我，為什麼，此時此地，我們會聽到這個?!!
我驀然抬頭，緊皺眉頭看著白粉友，激動問道: ｢…係咪剩得呢個frequency有?! 係咪!?｣
白粉友看著我們，似是不明白我們到底在驚訝什麼，緩緩搖頭道: ｢…唔…唔係，基本上毎一個可以聽到既頻度，都係播緊呢段聲帶…｣
我聽後一驚，什麼?!!
此時白粉友頓了一頓，又道: ｢…唔撚好意思…不過我呢啲無書讀既人，無考過會考…唔太知道你地講緊啲咩…可唔可以解釋下我聽?!!｣
我奇怪，向白粉友問道: ｢…咁你又叫我地聽?! 唔係話好特別既咩?!!｣
｢……~~~~……~~~~……~~~~……~~~~……｣
Greensleeves愈去愈遠，開始轉轉入了那比較寧靜的｢副歌｣部份。
只見白粉友突然閉合上雙眼，專注聽著Greensleeves…
良久，他眼睛繼續緊閉著，突然開聲道: ｢…差唔多喇…差唔多到喇…｣
嗄…?! 他說什麼?!
｢……~~~~~~~~~~~~~……~~~~~~~~~~~~~~~………｣
Greensleeves愈來愈慢，愈來愈慢；聽過此曲子無數遍的我，心內非常清楚，這曲子快要轉完一｢循環｣，結束｢副歌｣部份，回到那招牌的｢Greensleeves｣旋律了…
然後，就在此時，曲子突然中斷了。
沒了。
白粉友睜開雙眼，輕聲叫道: ｢…就係呢度。｣
我正想要開口疑問到底是幹嘛，收音機那頭，亳無預兆的，突然傳出了把聲音…
是把語調冰冷，猶如機器人的女聲…
女聲咬字清晰，字正腔圓，說話鏗鏘有力…
可說的，卻不是我們的母語…
她說的是普通話。
｢…以下是，中華人民共和國，廣東省人民政府，對廣東省市民，作出的一則特別廣播…｣
嗄?!! 這是什麼!!?
我反應驚訝，立即轉身看著白粉友，但見他微微向我點了下頭，示意沒搞錯。
｢…警報: 深圳市龍崗區大鵬半島的『大亞灣—嶺澳核電基地』發生嚴重核事故，中央政府決定，把大鵬半島方圓50公里範圍，正式列為『核輻射受影響區域』。根據中華人 民共和國，《國家安全特權條例》，第一百零八條，中央政府頒布緊急狀態令，下令居住於大鵬半島方圓50公里內的所有市民，立即遵從當地市政府的疏散指示， 本著有秩序，安全及系統化的三大方針，迅速從『核輻射受影響區』中撤離。中央政府確定，把大鵬半島方圓50公里內的土地及海洋範圍，均列作『核輻射受影響 區域』；此範圍北至惠州市，東至汕尾市，南至大三門島以南二十海哩，西至香港特別行政區西大嶼山分流半島。凡居住於『核輻射受影響區域』，或在該區內持續 活動的所有市民，應當立即遵從當地市政府的疏散指示，迅速撤離該區；凡航行於該區域內的所有船隻，收到此廣播後，請立即與當地海事局通訊，取得最新航道及 靠岸指示。重複…｣
隨後，這普通話女聲又把以上的廣播，隻字不漏的重複了遍…
當重複完畢後，廣播驀然中斷，收音機卻再次切回了，那遙遠又熟悉的，Greensleeves裡。
原文出自那夜凌晨，我坐上了旺角開往大埔的紅van FACEBOOK 專頁
https://www.facebook.com/lostonaredminibus/posts/195346410585962
感謝大家花時間看完我一篇文，如對本篇文章有任何意見，歡迎留言～喜歡的話請Share 給朋友啊！另外，右邊有小夢Facebook Page，加入後可以第一時間得到新Post 的通知啊！快快對小夢讚個好吧！
0 意見:
張貼留言