0 掩眼法 (上)

掩眼法 (上)

 

喺之前TVB個節目叫魔法擂台，當時的確令我對魔術有番少少興趣。坦白講，魔術係一種掩眼法就係人都知，最重要就係表演者Presentation 出黎點先吸引到大家。大型嘅魔術我反而無興趣，因為往往都知道係道具、或利用不同嘅工作人員製造出來嘅假象，反而我上Youtube 睇咗好多劉謙嘅魔術表演，好多係近距離桌上魔術，卻往往令我覺得神奇，好想知道究竟係點樣做。

 

魔術之所以厲害，就係明知要呃你，你都心甘情願比佢呃，因為你就係想可以踢穿佢，不過表演者要做到就係令你有興趣去踢穿佢呢個掩眼法才為之成功。想當年我比人呃去一個話全船充滿靚女嘅遊船河釣墨魚團，雖然，呢種被騙經常發生，　本來已經好醒目嘅我當然叫主持人Send 幾張相黎睇睇，不過結果依然係上到去一件可以令我落去傾下計嘅都無！以前俾人呃無數次去唱K落Pub，最多都係放低兩舊水走人，不過上到船唔通跳海遊番去咩？於是就被迫喺架船度幾個鐘了。

 

喺我一個人懶瀟洒咁望住個海，吸著一支純簿萬嘅時候，我一個朋友嘅朋友，竟然行埋我身邊，話咁悶，不如表演魔術俾我睇！大佬，唔係化，我已經比人呃咗上船，依家仲要睇你表演魔術？佢竟然可以感受唔到我嘅呼救，仍然想叫我喺５２隻牌之中抽一隻，然後放番落副牌度。我最後真係忍唔住出聲講句：大佬，我知你估到我抽中邊隻牌，得，你叻！咁你仲想點？

 

以上呢個故事係告誡識魔術嘅人，如果你真係想表演魔術俾人睇，首先練習好你嘅開場白，你整個Presentation，而唔係ON77咁走埋去叫人揀隻牌，OK?

 

有位純情靚女歌手兼千萬票房電影女主角喺一套戲入面一句對白講過：「呢個世界，咩都係掩眼法。你睇到嘅未必係真，真嘅又未必比你睇到。」無錯，原來每一個人每一日，都係喺度表演緊魔術。你番工嘅時候，明明你個肥佬老闆無啦啦拉你入房照肺，你心入面喺度dklm 但係依然可以恰熟狗頭笑笑口咁樣，其實亦即係表演緊魔術，或者中國人稱嘅戲法、變臉。而你老闆亦都明知你心入面有幾唔kur，但依然繼續望住你個恰熟狗頭，就明顯係想睇下你變臉可以變到幾耐，睇下幾時拆穿到你。當大家都知大家有幾假嘅時候，就好似我明知你變魔術係假我偏偏會繼續睇，我唔介意你假，不過我介意你變得唔好睇，如果你變得好好睇睇氹到我開心嘅，真又好假又好都無乜所謂啦！

(待續)