1 掩眼法 (中)

 

　　本身掩眼法呢篇只有上下集，不過喺突然腦入面多咗一點靈感，就形成呢個中篇了～

 

　　由細到大，我都好鐘意揭露真相，睇魔術時，我會立即想搵出破解魔術嘅方法。但原來好多時，知道魔術真相之後，反而會覺得無聊。而喺現實世界，某Ｄ事知道真相之後就更加會令自己唔開心。不過，有Ｄ掩眼法就的確要踢爆，既可以幫到自己亦可以幫到人。

 

　　現實中嘅掩眼法，有部份只係簡單嘅數字遊戲。我有一個好朋友，係名牌大學數學系畢業，初初識佢時覺得佢計數成日都好有問題，到後來先發覺佢先係利用數字玩遊戲嘅高手。

 

　　由識佢幾年間，見佢身家不斷上升，買樓一層又一層，股票儲完一球又一球。但佢一直話自己月薪只係萬零蚊，仲張糧單銀行出糧紀錄都俾我睇哂，直頭係喺我同我班朋友面前表演魔術一樣，叫你先檢查道具有無問題咁。

 

　　跟住魔術就開始，例如佢買咗層樓收租，我就話你就發啦，每個月又多８千蚊租收，佢竟然話３個月都收唔到租啦，連管理費都蝕埋。例如見佢做FreeLance有外快收入，就話你今次發達，佢就可以話早兩個月買咗工行中行建行呢份FreeLance都未夠輸。初初都覺得好自然覺得原來佢都幾慘喎，放工做份外快點知買隻股又輸哂。

 

　　當過幾個月，就關心下究竟層樓收咗租未，答案依然係個租客有兩個月未租。當Ｄ股票升番，就話你就正啦，終於升番贏錢，佢答案就係岩岩先番家鄉咋，無錢贏。

 

　　答案係咪好似好合情合理？事實係半年後，佢依然只有兩個月租未收（實際上係個租客亦都用數字遊戲食咗番佢兩個月按金，到時可以一走了之）；FreeLance 錢用黎買股票 -> 賬面輸 -> 升番家鄉。就喺呢度，FreeLance 錢由於係半年前收咗，股票亦岩岩番家鄉，利用呢點，錢就不知不覺咁落左袋了。至於股票贏錢時，亦會用其他掩眼法，例如預交咗一年保險費，幫個仔交咗一年學費，甚至係唔小心供多咗三個月樓等等等等的借口，總之每次有錢，就將佢化為支出、變作零。當半年一年兩年後，就會神不知鬼不覺咁入袋，呢種連自己都呃埋嘅儲錢掩眼法，的確值得學習。

 

　　好多時金額機構亦都係用一Ｄ掩眼法，理論上佢並無呃人，只不過係簡單嘅掩眼法，就如魔術表面一樣。例如依家銀行有所謂高息掛勾存款，佢只會話你知喺指定日子內掛勾某股票／外幣，就可以得到１０厘甚至２０－３０厘嘅年利率。對財金無知識嘅普通師奶，就會覺得都幾好喎，好過放銀行收息啦，於是就落撘了。其實呢類型嘅高息掛勾存款其實係Short Put (沽出認沽期權)，收取期權金（由於呢篇唔係講投資，表過不提，有興趣的朋友可以自行研究。）利用「高息」、「存款」、「２０厘」取代Short Put，期權金字眼，是否更易明白覺得更加容易？而銀行就係用呢種掩眼法去搏取部份人嘅信任，承受住與Short Put 一樣的高風險去做所謂高息掛勾存款，但得到的回報往往更少。

 

　　其他例子例如借貸的每月平息、免息但收每月0.5%手續費（詳見http://blog.yahoo.com/dreamsdream/articles/16863/index）。基金的３０年後回報收費（詳見http://blog.yahoo.com/dreamsdream/articles/16585/index）

 

　「呢個世界，咩都係掩眼法。你睇到嘅未必係真，真嘅又未必比你睇到。」咁究竟，睇到定睇唔到會好Ｄ？下集掩眼法完結篇。