到今年，年頭都忙住睇樓，買完樓後又開始裝修，買傢電，好彩嘅係上PS4 打機都識到個做裝修嘅老闆，喺佢幫忙下，算比其他人輕鬆完成全屋裝修，最重要係識到位新嘅好朋友。
講開朋友，今年雖然有個識咗幾年嘅離去，亦有D 小插曲嘅出現，緣來緣去，世事就係咁，有D人有緣到打機都識, 有D 人到經常傾計都發現其實性格相差太遠。自問會真心對每一個人，對朋友只會講真話，或許有時口直心快有人不喜歡，但我亦都唔會改變自己，因為我始終覺得對人唔應該虛偽，有道理嘅唔岩聽我都會照講。
咁多年來，我用呢種性格去生存，我知相信我嘅人有好多，而唔喜歡嘅亦都自行離去，留低嘅廢柴同盟，兄弟幫，甚至係薑餅人成員如無意外都會繼續大家一齊進步，玩樂時固然高興，到大家有事，認真時亦會互相幫忙，我都感激呢一年入面幫過我嘅，陪過我嘅咁多位朋友。
等咗十幾年，南港島線終於開通，未開前，我覺得終於可以多點見朋友，車程近咗可以拉近人與人之間嘅距離，不過有句說話，有緣千里能相遇，其實只要大家有心嘅，少見面亦都可以係好朋友，相反，就算住得幾近，亦未必會聯絡。不過，幾年來我答應過等地鉄開就得閒飲茶嘅朋友們，下年隨時約我啦！
展望2017， 上半年都係休養生息，盡情玩樂；下半年工作環境或許會轉變，甚至有人生中更大嘅任務要做。無論如何，我都會希望自己活在當下，一步步完成所有嘅目標。
最後，祝大家新年快樂，明年大家都做到自己想做嘅事！
0 意見:
張貼留言