4 最低工資

發現我打幾篇隨口UP 好多朋友讚好，我又諗諗下，既然係咁就盡量寫Ｄ自已諗到想到的東西，未必要人鐘意睇，自已鐘意舒發下就可以了。

最近各方都喺度談論最低工資，由我樓下看更到我公司的外判工，的確地現在有部份人工資低得不合理，他們選擇不拿綜媛而給上合理的工資係應份的事，但係最低工資過後，會令到全部本應由１５蚊到２８蚊的工種，全部都變為２８蚊，會引發以下的事情：

1. 有得揀既人：既然全部工種的人工變得一樣，以前可能因為某Ｄ工種辛苦（如旺角的茶餐廳就比麥記辛苦），因為以前做茶仔２６蚊個鐘而麥記只得１５蚊，於是佢會選擇咗做茶仔，但當如果人工及其他條件相同時，茶仔同麥記，有得揀我一定揀做麥記！

2. 無得揀既人：有某Ｄ人，可能因為不同問題（講野有語病，面容不討好，身型超肥胖，幾千度近視），他們全部都不是弱智，但議價能力比一般人為低，但有些工種因為人工低，而他們亦不介意人工低而去做；但當市價２８人人平等的時候，有得揀的人就會去搶這類工作，而僱主亦都會願意去請工作能力比較高（甚至係樣比較討好）的人去做，無得揀既人就會失業，或流向一些更加不討好的工作。

3. 暑期工：這個問題係我現在遇到的問題！以往每年都會有１０個８個暑期工，每個４千蚊一個月，今年因為最低工資沒有了，因為如果要給最低工資，唔計假錢飯鐘錢，都要近６千蚊一個月，與其請一Ｄ無經驗又要慢慢教的小朋友，還要給他們得閒請假去旅行番學校聽ＴＡＬＫ等高考會考放榜，不如就搵外判PartTime？我相信今次的最低工資，令今後的暑期工再沒立足之地！

其他很多的問題，我在報紙新聞已經睇到聽到唔少，不再重覆。但我相信真正實施後所產生的問題，一定比我們所能夠想到的更加多。

不過，我既唔會係有機會拿最低工資的一群，亦都唔會係出糧比人的一群，就當係睇戲，睇下下一步有什麼發生？