0 金水壽司 @ 油麻地 - 只有火焰壽司吸引

(封面圖片)火焰壽司

喺淘寶買完野，自然要出油麻地去淘點收貨，喺淘寶買野真係平夾抵，我地兩個洗咗都唔夠２千蚊就成３大袋！

喺拎住幾袋野成包米咁重之下，都無餘力行去旺角同人迫搵野食了，於是決定向少人的油麻地進發，見到金水唔洗等位就入去坐了！

七點零鐘，客都係得兩三枱～～生意真係越來越差，係咪個個都等１０點半價先黎食呢？

由於星星唔食生野，我呢輪亦都肚唔多舒服，於是今日都以熟食為主
先叫一個牛肉石頭飯打底，連麵豉湯

我稱呢個係假的石頭飯，上來時係唔熱的
飯係飯煲煲完再放上石鍋入面
牛肉亦都好硬，唯獨味道可以接受，有少少辣都幾冶味

為食的我亦都點上一個凡立貝壽司，不過吃上來不夠鮮甜


之後一個軟殼蟹手卷，等的時間黎講，照計應該係即叫即整，但來到的時候竟然係凍的！
而且炸粉比蟹更多，不合格！

最後的便是火焰壽司了，是這裡最吸引的一樣，烤過了的沙律醬配上三文魚及蟹棒，是不可多得的絕配，為這餐廳救回不小分數！

總括而言，我對這餐是不太滿意的，只是火焰壽司比較可取，要再來的話應該要等宵夜時段半價才可以了

消費: 約$120位
味道: ★★★
推介美食:  火焰壽司
地址: 油麻地彌敦道565-567號銀座廣場地下1號舖及UG全層