3 期權討論區

我一直覺得期權係一樣最公平嘅衍生工具，皆因其可以買上(Long Call) 、買落(Long Put)、賭佢唔上(Short Call)、賭佢唔跌(Short Put)都得。可以話係任君選擇。
如果大家有投資開，應該都好明白Long Call 同Long Put 嘅道理，就係好似買Warrant 咁，但係好處在於唔洗接受發行商嘅條款，行使價，月份方便選擇亦都更多！需知道Warrant 最大嘅吸引之處在於喺短期內由價外入價內嗰種爆發力，期權就正正係有極多呢種選擇。

好似今日做例子，友邦（＃１２９９）尋日大跌，今日見佢穩定想買Call 搏一搏，但市面上嘅認購證完全揀唔落手，反而Options 可以有最好嘅比我揀，揀即月28蚊呢種少少價外嘅認購證，今朝仲係0.18-0.20之間任買，當佢一升破２７蚊後就開始爆炸性上升，好快就有一倍回報！！最岩鐘意快打快嘅人！

臨近月尾嘅時候，Long Call/Put 爆發力更加大...一定比WARRANT 好好多!

當然，大家可能會話牛熊證打法可能有更大利潤，的確我本身都有用，但係呢度想同大家討論一下期權，所以暫時唔講牛熊證住～～

今篇先講咗Long Options ，其實理論同ＷＡＲＲＡＮＴ係１００％相同，只係好處在多選擇。
之後會重點講一講Short，因為我相信有好多人會唔明呢樣，希望大家一齊討論下啦！！
有唔明可以問下我，我會盡量解答。

本人不是從事證券相關行業，亦都無考慮過會去做，只係因為興趣自８年前開始研究股票，亦都自己去考咗D Paper　1,2,7.8.9 O個D，所以對各工具有少少認識，想搵志同道合朋友傾下，亦都想令香港人更加多玩期權呢樣工具，唔洗比輪商呃！！