尋晚喺屋企睇TVB 東張西望，其中一節介紹有個伯伯９０歲，駝哂背都仲喺度日日推住雪榚車做小販；初初以為係啲慘嘅老人家，但睇原來本身佢有仔女肯俾錢佢，但係佢自己堅持去學校門口擺檔，目的係為堅持自己幾十年來嘅事業，亦都為服務學校嘅學生們啊！呢份堅持試問又有幾多人學到？我諗大部份人同我想法都一樣，盡快搵夠錢退休吧？
可能自己都要從新思考一下，究竟係伯伯做得岩，定係自己嘅諗法岩？
諗起我地以前學校隔離有間欣欣士多，個老闆都係為我地而生，最近都得知佢都要結業了。
香港嘅舊區越來越少，唔好話小販、士多，新嘅樓通常都係屋苑，地鋪嘅數目已經越來越少了，旺區嘅地鋪則變哂錶行、金行，所有老店亦都被迫遷。雖然我並唔係一個懷舊喜歡保育嘅人，但係全條街都係金鋪，想點？由一個所謂中西新舊文化匯合嘅城市，變為周街周圍商場都係一式一樣大牌子商店嘅城市了。無他，小商戶敵得過加租咩？敵得過加地產霸權？
嘅然無辦法令租金回落，倒不如從新發小販牌啦！只要政府做好規劃，從新發小販牌俾有創意、有心賣小商品嘅人，咁唔洗捱貴租，市民亦都可以不必迫住逛百老Ｘ、周ＸＸ、東Ｘ錶行等等。有朝一天，希望可以好似喺ＮＥＷＹＯＲＫ咁，經過會見到有架熱狗車，買隻熱騰騰嘅熱狗食！
0 意見:
張貼留言