小夢哥，我睇中我對面舖條女，但我同佢三唔識七，究竟用咩方法可以識到佢，吸引到佢注意呢？
心急人上
A:
嗱，我唔知你對面舖係對面幾遠，不過既然你問到，我都嘗試下教下你啦！！
你對面舖即係會賣野啦，佢賣乜你咪試下過去話你想要啲乜，例如佢係賣GAME嘅，你咪搵隻明知幾日後先出嘅GAME，日日走去問佢到咗貨未，之後就話佢知你就係喺佢對面舖度做，比低你舖頭電話佢，或者叫佢一有貨就走過黎話你知，呢招可以早晚各一次，一星期做足七日，起碼都有幾句計傾下先，岩咀型嘅咪去咀兩咀。。唔係，係吹多兩咀先岩，吹下仲有咩GAME呀，之後你又吹下你舖頭賣乜，記住話佢聽你有折，叫佢得閒放工放冕過黎睇下，慢慢混熟啦！
Q:
小夢哥，我岩岩升中六，轉咗間男女校，想識隔離班個同學，但我岩岩黎到人生路不熟，唔識人幫我撘路，仲有咩方法？
中六雞上
A:
同學呢Ｄ就話咁易啦，話明同一間學校，即係一個星期見足五日！首先好好調查佢番學時間，扮偶遇又好乜都好，買定份Ｍ記早餐加多２個薯餅，之後走埋去話佢知Ｍ記條友唔知做乜比多咗個薯餅你，問佢食唔食囉！
Q:
小夢哥，我岩岩做SUMMER JOB見到個女仔好靚，對眼閃令令，簡直就係我心目中嘅女神！但係佢竟然同我唔同DEPARTMENT做野，平時佢身邊又總會有兩三個男仔同佢一齊番工放工食飯咁，有咩方法可以識到佢呀？！
想識女神的宅男上
A:
你呢個情境同我細個番工時好相似，就用番我當年試過做既無聊野啦！有時Ｄ野係要年輕時先做得，到我依家三十勾都黎真係再做唔出架喇！
故事就係咁，當年我公司有個SUMMER JOB 又係同我唔同部門，身邊又係經常圍住幾個觀音兵，你知要成為觀音兵嘅一份子真係唔容易，我就唯有去零食物語買咗幾打朱古力，扣除比身邊Ｄ同事食咗既之後，總數得番廿粒，咁以前我公司要打卡番工，首先偷睇到佢係打邊張卡知道佢幾點番工幾點放工，咁就要早過佢番工，喺佢番工之前將粒朱古力放喺佢張卡上面，夜晚佢臨放工前亦都要放一粒，重點係唔好咁易比人發現係邊個放，好快佢就會有興趣知道係邊個做埋Ｄ無聊野放喺佢張卡度架喇！如是者放咗１９粒之後，佢都忍唔住喺放工時企定定喺個卡鐘度唔走，點都要搵出係邊個放為止咁既樣！
咁就即係如計劃之內啦！結果我就行埋去，親手交粒朱古力比佢，仲笑笑口咁講話呢粒係最後一粒，叫佢好好珍惜啦！
當然以我咁有心思，最後都識到呢位女神啦！
唯一敗筆係，我覺得唔應該喺零食物語買，應該去Ｄ高級Ｄ既舖買粒心型好味Ｄ嘅嘛！
想識我? 咁要諗下計啦! (設計對白)
0 意見:
張貼留言