0 少年食神推介之熱狗 - 丹麥餅店

由於今朝一早要出中央圖書館，亦都因為搭車搭錯站，就要由利園一路行過去～
不過行行下就經過呢間丹麥餅店，想起有集少年食神MICHAEL 推介話佢以前日日都食呢間做早餐，一於就一試啦！！

舖頭係好舊式的餅店，舊到應該係我出世前的年代，先喺門口收銀阿姐流水式收錢，之後係即叫即整，不過都係３０秒內就有的啊！！

見到好多人食漢堡扒呀、豬扒包呀！不過一大朝早其實都未訓醒，都係叫個熱狗食啦！！

呢個熱狗$8.5，其實真係超值，依家喺Ｄ連鎖麵包店買一個普通腸仔包都要$6.5！
熱狗包外脆內軟，腸仔亦係即煎，再加上很MATCH的沙律醬，正呀！！
如果我公司或屋企樓下有，我一定日日買黎食啦！！

舖入面仲有奶茶咖啡、豬扒包，漢堡扒包等等～～全部都係即叫即整，好吸引啊！！下次再經過一定試下佢個漢堡扒同豬扒包呢！

呢種舊式舖頭真係買少見少，希望佢長做長有吧！

地址 :          銅鑼灣禮頓道106號禮信大廈地下